रुकुम पश्चिमको आठबिसकोट नगरपालिकामा खानेपानी सेवा सहायता सम्बन्धि अभिमुखिकरण गोष्ठी सम्पन्न भएको छ । खानेपानी व्यवस्थापन सुदृढीकरणका लागि अभिमुखिकरण कार्यक्रम सम्पन्न गरिएको हो । आठबिसकोट नगरपालिका वास इकाईको आयोजनामा नगरपालिकाका प्रतिनिधि, विषयगत शाखा प्रमुख र सरोकारवालाहरूको सक्रिय सहभागितामा कार्यक्रम सफलतापूर्वक सम्पन्न भएको हो।
अभिमुखिकरणमा खानेपानीको दिगो उपयोग, प्रविधिको प्रयोग, मर्मत–सम्भार प्रणाली, र समुदायको भूमिकाका विषयमा व्यापक छलफल गरिएको थियो । कार्यक्रममा बोल्दै आठबिसकोट नगरपालिका नगरप्रमुख रवि केसीले भने, “स्थानीय स्रोतको संरक्षण र सही व्यवस्थापन बिना खानेपानी सेवा दीगो हुन सक्दैन। यसका लागि समुदायको सशक्त सहभागिता अपरिहार्य छ।” खानेपानीलाई व्यवस्थित र दिगो बनाउन सबैको दायित्व भएको उनले बताए ।
सहभागीहरूले अभिमुखिकरण कार्यक्रमबाट खानेपानी प्रबन्धनसम्बन्धी नयाँ जानकारी प्राप्त भएको र आगामी दिनमा आफ्नो उपभोक्ता समितिमार्फत सेवा सुधारमा लाग्ने प्रतिबद्धता जनाएका छन्। यो अभिमुखिकरण कार्यक्रमलाई समुदायमा खानेपानी सम्बन्धी जनचेतना अभिवृद्धि र दीगो सेवा प्रवाहमा एक महत्वपूर्ण कदमको रूपमा हेरिएको छ ।
त्यस्तै नगर उपप्रमुख धन कुमारी शाहीले नगरवासीको दिगो जीवनस्तर सुधार गर्न सुरक्षित र व्यवस्थित खानेपानी सेवा अपरिहार्य रहेको बताईन । यसका लागि नगरपालिकाले दीगो पूर्वाधार निर्माण, उपभोक्ता समितिको सशक्तीकरण, र नियमित मर्मत–सम्भारमा प्राथमिकता दिरहनुपर्छ । शाहीले भनिन, आजको अभिमुखिकरण कार्यक्रमले जनप्रतिनिधि, प्राविधिक, र समुदायबीच सहकार्यलाई अझ मजबुत बनाउने विश्वास लिएको छु।”
नगर उपप्रमुखले खानेपानी योजनामा देखिएका समस्या समाधानका लागि नगरपालिकाले आवश्यक नीति तथा बजेट व्यवस्थापन गर्दै आएको उल्लेख गर्दै आगामी दिनमा पनि यस्ता अभिमुखिकरण कार्यक्रमहरू निरन्तर सञ्चालन गरिने प्रतिबद्धता व्यक्त गरिन्।
सुस्वा आयोजनाका डिपुटी टिम लिडर मान बहादुर विकले स्वागत मन्तव्य राख्दै खानेपानी सेवा सहायतालाई विस्तारित रुपमा लैजाने र सुस्वा आयोजनाले आगामी दिनहरुमा पनि खानेपानी आयोजनालाई दिगो र प्रभावकारी रुपमा कार्यान्वयन गर्न प्रतिबद्ध रहेको बताए । आठबिसकोट नगरपालिकामा खानेपानी सेवा सहायता केन्द्र स्थापना भएको छ । जसले बिग्रीएर रहेका खानेपानी आयोजनालाई मर्मतमा सहयोग गर्ने छ ।
कार्यक्रममा वास सपोट अफिसर धर्मराज छन्त्यालले समुदायमा खानेपानीका संरचनाको अवस्था, मर्मत सम्भार, ग्रामीण खानेपानी सेवा सहायता , प्रक्रियागत संरचना स्थापना र सरोकारवालाको भुमिका र जिम्मेवारी बारे प्रष्ट पारेका थिए । बिहिबार नगरपालिकाको सभाहलमा भएको उक्त कार्यक्रममा नगर प्रमुख रवि केसी, नगर उपप्रमुख धन कुमारी शाही, निमित्त प्रमुख प्रशासकीय अधिकृत राजेश गौतम , वास सल्लाहकार प्रमोदलाल श्रेष्ठ , सुस्वा आयोजनाका डिपुटी टिम लिडर मान बहादुर विक, वास संयोजक नरेन्द्र केसी, एमआइएस सल्लाहकार छत्र चौधरी लगायतको उपस्थिति रहेको थियो ।
