आठबिसकोट । जाजरकोटको नलगाड नगरपालिका-८ मन्मै स्थित ठुलीभेरीमा पौडी खेल्ने क्रममा भेरीमा बगेर दुई जना बालबालिकाको मृत्यु भएको छ । भने एक बालिका अझै सम्म बेपत्ता छन्। आज शुक्रवार दिउँसो साढे २ बजेतिर विधालयबाट घर फर्किएपछी ठुलिभेरी नदीमा पौडी खेल्ने क्रममा एउटै घरका दिदि भाई सहित तीन जना बेपत्ता भएका थिए ।
मृत्यु हुनेमा नलगाड-८ का अन्दाजी १२ वर्षका महेश कुसारी र सोही गाउँकी १२ वर्षिया भगवती नेपाली रहेका छन्। उनीहरुलाई करिब ८ सय मिटर टाढा रहेको रुकुम पश्चिमको आठबिसकोट ९ स्थित गिजागाड खोला नजिकैको भेरी किनारामा फेला पारिएको हो । नेपाल प्रहरी, आठबिसकोट नगर प्रहरी र स्थानीयको खोजिकार्य पछी बेपत्ताको शव फेला परेको बताईएको छ । सङ्गै बेपत्ता भएकी अन्दाजी १४ वर्षिया आशा कुसारी अझै बेपत्ता अवस्थामा छन्। उनको खोजी कार्य भैरहेको छ ।
बेपत्ता आशा र मृतक महेश एउटै परिवारका दिदि भाई हुन्। उनीहरु आठबिसकोट स्थित शहिद स्मृति नमुना माविमा अध्ययनरत भएको बुझिएको छ । एउटै वडाका ३ जना बालबालिका एकै साथ भेरीमा बगेपछी गाउँमा अहिले रुवावासी चलेको छ । मृतकको शव आठबिसकोट नगर अस्पतालमा पोस्टमार्टम पछि शब आफन्तलाई बुझाईएको प्रहरीले जनाएको छ । एउटै गाउँका दुई बालकको मृत्यु र एक बेपत्ता भएपछी नलगाड ८ नम्वर वडा नै शोकमा डुबेको छ ।
नलगाड नगरपालिकाका नगर उपप्रमुख देवका लामिछाने सहित स्वास्थ्यकर्मीको टोली आठबिसकोट नगर अस्पतालमा पुगेर घटनाको बारे बुझेको थियो । बालबालिका भेरीमा बगेर बेपत्ता भएको खबर पाउना साथ आठबिसकोट नगरपालिकाका नगर उपप्रमुख धन कुमारी शाही, प्रशासकीय अधिकृत राजेश गौतम, नगर प्रहरीको टोली , ईलाका प्रहरी कार्यालय आठबिसकोट बाट खटिएको प्रहरी टोली र स्थानीयले बेपत्ता भएकाहरुको खोजी कार्य तिव्र रुपमा गरेका थिए । तर भेरीमा पानीको वहाव बढेकाले र भेरीले बगाएको सुचना ढिला प्राप्त भएका कारण सकुसल उद्धार गर्न नसकिएको प्रत्यक्षदर्शीहरु बताउँछन्।
