सबैका लागि दिगो खानेपानी सरसफाई तथा स्वच्छता आयोजना (सुस्वा) आठबिसकोट नगरपालिका वास ईकाई अन्तर्गत खानेपानी तथा सरसफाई योजनाको दोस्रो सार्वजनिक परिक्षण र अनुगमन कार्यक्रम सम्पन्न भएको छ । नगरपालिकामा सञ्चालित ७ वटा खानेपानी तथा सरसफाइ आयोजनाहरुको सार्वजनिक परिक्षण र अनुगमन कार्यक्रम सम्पन्न भएको हो ।

शुक्रवार देखि सुरु भएको उक्त कार्यक्रम हिजो आइतवार सम्पन्न भएको हो । आर्थिक पारदर्शी र जवाफदेहिताको लागि प्रत्येक उपभोक्ता समितिहरु मार्फत सार्वजनिक परिक्षण सङ्गै गरिएको अनुगमनमा आठबिसकोट नगरपालिकाका नगर उपप्रमुख तथा योजना अनुगमन समिति संयोजक धन कुमारी शाही, वास संयोजक नरेन्द्र केसी , वास सल्लाहकार प्रमोदलाल श्रेष्ठ , वास गुणस्तर सहजकर्ता सन्तोष जेठारा र वास प्राविधिक सहजकर्ता बिरेन्द्र बटालाको उपस्तिथिमा योजनाहरुको अनुगमन गरिएको हो ।

तीन दिन सम्म गरिएको अनुगमन तथा सार्वजनिक परिक्षणमा आयोजनाको आय/व्यय , प्रगति विवरण सँगै समुदायमा सरसफाईको अवस्था बारे जानकारी गराइएको थियो । हामीले परियोजनामा देखिएका प्रगति र उपलब्धिहरूलाई खुलेर प्रस्तुत गरेका छौँ। वास संयोजक नरेन्द्र केसीले भने “स्थानीय जनप्रतिनिधि, उपभोक्ता समिति र प्रविधिक टिमको सहकार्यले यो अवस्था आएको हो । “सार्वजनिक परीक्षण भनेको जनतालाई जानकारी दिनु मात्र होइन, उनीहरूबाट प्रतिक्रिया पनि लिनु हो र “हामी जनताको हरेक सल्लाह र सुझावलाई समेट्नेछौं र सुधारका लागि उपयोग गर्नेछौं।”

आयोजनामा झण्डै ८५ प्रतिशत काम सम्पन्न भएको प्राविधिक सहजकर्ता बिरेन्द्र बटालाले बताए। खानेपानीका सबै संरचना डिजाइन इस्टमेट अनुसार निर्माण भैरहेकाले गुणस्तरिय हामिले सुनिश्चित गरेका छौँ । र सबै धारामा २४ सै घन्टा खानेपानी आउने गरेर डिजाइन गरेका छौँ । अबको यात्रामा अझ पारदर्शी, सहभागितामूलक र परिणाममुखी विकास गर्ने हाम्रो प्रतिबद्धता छ । “हामी अनुगमनलाई निरन्तर प्रक्रिया बनाउनेछौं, केवल औपचारिकताको रुपमा होइन्। नगर उपप्रमुख धन कुमारी शाहीले भनिन, खानेपानी जस्तो आधारभूत आवश्यकतामा पारदर्शिता र जवाफदेहिता कायम गर्न यस कार्यक्रमले महत्त्वपूर्ण भूमिका खेलेको छ । आयोजनामा भएका उपलब्धि, खर्च, प्रगति, चुनौती सबै तपाईं–हाम्रो सामु खुला रूपमा प्रस्तुत गरिएको छ । यसले सबैलाई सजग बनाएको छ ।

उक्त आयोजनाबाट आठबिसकोटमा ४ सय बढी धरधुरी लाभान्वित हुने जनाइएको छ । सबै आयोजनाको काम अन्तिम चरणमा रहेकोले असार महिना भित्रै धारामा पानी आउने बताईएको छ । यो खानेपानी आयोजनाले दुर्गम बस्ती देखि बजार क्षेत्रमा सहज पहुँच बिस्तार गरेको उपभोक्ताहरुको भनाई छ ।