आठबिसकोट । मदिरा बिक्रि वितरण तथा सेवनमा रोक लगाईएको रुकुम पश्चिमको आठबिसकोट नगरपालिका-८ मा बिधालयकै प्रधानाध्यापकले बिधालय नजिकै मदिराको व्यापार गरेको पाइएको छ । आठबिसकोट नगरपालिकाले गरेको अनुगमनका क्रममा दाजे स्थित हिमालय माविका प्रधानाध्यापक नवराज बुढाले अवैध रुपमा मदिरा विक्रिवितरण गरेको पाईएको हो । उनले विवेक स्टेशनरी तथा किराना पसल नाममा दर्ता गरेको पसलमा मदिरा तथा चुरोट र सुर्तीजन्य पदार्थको व्यापार गरिरहेको पाईएको हो ।
अनुगमन टोलीका अनुसार बिधालय भन्दा करिब ३ मिटरको दुरीमा रहेको उनको पसलमा मदिरा विक्रि वितरण गरेको पाईएपछी उनलाई १० हजार रुपैयाँ जरिवाना गरिएको छ । २०८१ जेठ ३ गते आठबिसकोट नगरपालिका-८ ले मदिराजन्य पदार्थ विक्रिवितरण तथा सेवनमा रोक लगाएको थियो । वडा कार्यालय, स्वास्थ्य संस्था र विधालय तथा सार्वजनिक क्षेत्र आसपासमा मदिरा विक्रिवितरण गर्न नपाईने भनी समुदाय स्तरमा आमभेला गरेर मदिरामा प्रतिबन्ध लगाईएको वडा नम्वर-८ का अध्यक्ष खगेन्द्र विकले जानकारी दिए ।
वडा कार्यालयले मदिरा विक्रि वितरणमा रोक लगाएको पत्र
अध्यक्ष विकका अनुसार मदिरा प्रतिबन्ध गरिएको वडामा कसैले मदिरा विक्रिवितरण गरेको पाईएमा आठबिसकोट नगरपालिका मदिरा नियन्त्रण सम्बन्धि निर्देशिका २०७५ बमोजिम कानुनी कारबाही गरिने बताए । उनले भने, प्रधानाध्यापक लाई मदिरा बिक्रिवितरण नगर्नु भनेर दुईतीन पटक सुझाव दिएको हो । तर अटेरी गरेर उहाँले लुकाएर विक्रि वितरण गर्दै आउनु भएको थियो । मदिरा प्रतिबन्ध लगाउदा प्रअ स्वयंमले निर्णय पढेर हस्ताक्षर गर्नु भएको हो । तर आफैले नियमको उलङ्घन गर्नुभयो ।
वडा कार्यालयको सर्वपक्षिय बैठकको निर्णय अनुसार वडा नम्वर-८ मा मदिरा विक्रिवितरण गरेको पाइएमा ५ हजार देखि ८ हजार सम्म जरिवाना गरिने जनाईएको छ । तर सार्वजनिक पदधारण गरेका व्यक्तिले नै वडा कार्यालयको निर्णय उलंघन गर्दै कानुन विपरित अवैध रुपमा मदिरा विक्रिवितरण गर्दै आएको पाइएको छ ।
मदिरा ऐन अनुसार कुनै व्यक्तिले अनुमतिपत्र बेगर र अनुमतिपत्र पाएकोले पनि अनुमतिपत्रमा तोकिएको शर्तबमोजिम बाहेक मदिरा बिक्री, वितरण गर्न वा मदिरा खुवाउने बार वा रेष्टुरेण्ट वा पसल थाप्न पाउने छैन । भनी कानुनमा स्पष्ट लेखिएको छ । तर यहाँका धेरै जसो पसलले सबै सामान एकै ठाउँमा बिक्रि वितरण गरिरहेका छन्। नेपालको प्रशासनिक कानून, सार्वजनिक शान्ति सुरक्षासम्बन्धी ऐन, २०२८ र मदिरा नियन्त्रणसम्बन्धी स्थानीय तहका ऐन तथा कार्यविधिहरू अनुसार विद्यालय क्षेत्र वरपर मदिरा बिक्री गर्न अपराध मानिन्छ।
