नेपाली कांग्रेसका महामन्त्री तथा पूर्वमन्त्री गगनकुमार थापाले पूर्वराजा ज्ञानेन्द्र शाहमाथि नेपालमा उत्पात र भाँडभैलो मच्चाएर सत्ताकब्जा गर्न चाहेको आरोप लगाएका छन् । रुपन्देहीको कञ्चन गाउँपालिकामा आज (बुधबार) आयोजित रुपन्देही क्षेत्र नम्बर ५ को तेस्रो क्षेत्रीय सम्मेलन उद्घाटन गर्दै उनले यस्तो बताएका हुन् । उनले भने,‘पूर्वराजा ज्ञानेन्द्र शाह नेपालमा उत्पात मच्चाएर, भाँडभैलो गरेर सत्ताकब्जा गर्न चाहनुहुन्छ । आफ्नो हातमा शासन सत्ता लिएर चलाउन चाहनुहुन्छ । यसमा लुकेको केही छैन, तर उहाँको चाहना पूरा हुँदैन ।’ थापाले नेपाली जनताले राजाको शासन नभएर जनताको शासन रोजेको र गणतन्त्र आएको दाबी गरे । उनले भने,‘नेपाली कांग्रेसले बडो स्पष्ट रुपमा आफ्नो अनुभव, विवेक र ज्ञानको आधारमा अधिवेशनबाटै संवैधानिक राजतन्त्र भन्ने विधानमा रहेको व्यवस्था बदलेर गणतन्त्र लेखेको हो ।’ सो क्रममा उनले पार्टीको १५औं महाधिवेशन २०८३ सालको मंसिरभित्रै गरिने र यसमा कोही पनि अलमलमा नपर्न सुझाव दिए ।
०१५ सालमा विपी कोइरालाको सरकार बनेको र राजा महेन्द्रले जनताबाट निर्वाचित संस्थालाई अपदस्थ नगरेको भए नेपालमा संवैधानिक राजापनि रहने अवस्था हुन्थ्यो भन्ने स्मरण गराए । उनले नेपालको ३० वर्ष राजाको एउटा लहडमा खेर गएको आरोप लगाए । २०४६ सालपछि अलिकति वामे सरेको भएपनि केही गल्ती भएको थापाले स्विकारे । कांग्रेसभित्रको झगडा मिलाउन नसक्दा र घरको झगडा जनतामा लगेर थोपरेपछि त्यतिवेलापनि समय खेर गएको उनले सुनाए । त्यसमा कहीँ न कहीँ आफूहरुको पनि दोष रहेको स्विकारे । त्यसपछिको १० वर्ष माओवादी हिंसामा देश गएको थापाको आरोप छ । उनले भने,‘बन्दुक, बारुद, बम यसका बीचमा हाम्रा दिनहरु बिते, २०६२ सालपछि हामी फर्किएर आयौं, अर्को १० वर्ष हाम्रो संविधान निर्माण गर्ने नाममा गयो, आज हाम्रो हातमा संविधान छ । स्थानीय सरकार छ । पाँच पाँच वर्षमा चुनाव हुन्छ, सांस्कृतिक, धार्मिक अधिकार सुनिश्चित् भएको छ । नेपालको इतिहासमा हामीले कल्पना पनि नगरेको पूर्वाधार बनिसकेको छ ।’
