क्रान्तिकारी कम्युनिस्ट पार्टी नेपाल दाङले जिल्लाका सिमेन्ट उद्योगहरूका कर्तव्यहीनता र वातावरणीय असरबारे गम्भीर आपत्ति जनाएको छ। उक्त पार्टीले नेपाल विद्युत प्राधिकरणसँग रहेको अरबौंको बक्यौता रकम तत्काल असुल्न र उद्योगीहरूले स्थानीय जनतासँग गरेका वातावरणीय तथा सामाजिक प्रतिबद्धताहरू पूरा गर्नुपर्ने माग गरेको छ।

पार्टीका अनुसार नेपाल बिद्युतप्राधिकरणलाई सिमेन्ट उद्योगीहरूले बुझाउनु पर्ने बक्यौता सोनापुर सिमेन्ट उद्योग ६२ करोड २५ लाख, सम्राट सिमेन्ट उद्योग लमही ३७ करोड ८४ लाख, र घोराही सिमेन्ट उद्योग, गोग्ली १ अर्ब ४८ लाख बुझाउन बाँकी छ । तर यी उद्योगहरूबाट बक्यौता उठाउनेतर्फ राज्यले कुनै प्रक्रिया चालेको छैन
पार्टीले भनेको छ कि, यदि सामान्य नागरिकले विद्युतको बिल ६० दिन भित्र नबुझाएमा विद्युत लाइन काटिने व्यवस्था लागू हुने भए तापनि, उद्योगहरूको अरबौंको बिल उठाउने कुनै ठोस कदम नचलाइएको र त्यसमा राज्यको लापरवाही रहेको भन्दै कडा आपत्ति जनाएको छ।

यसैगरी, सिमेन्ट उद्योगहरूले वातावरणीय असन्तुलन निम्त्याउने धुलो, धुवा र ध्वनि प्रदूषण फैलाइरहेको बताउँदै स्थानीय जनताले यसका कारण स्वास्थ्य र वातावरणीय समस्या भोग्दै आएको प्रेस बिज्ञप्तिमा भनिएको छ । साथै उक्त पार्टीले राज्यसँग उद्योगीहरूलाई वातावरणीय र सामाजिक प्रतिबद्धताहरू पूरा गर्ने दबाब दिने र संम्वन्धीत सरोकारवालाहरूले यस मुद्दामा ध्यान नपुर्याएमा जनसंघर्षमा जाने समेत चेतावनी दिएको छ ।