आठबिसकोट । रुकुम पश्चिमको आठबिसकोट नगरपालिका-७ मा एकै दिन २ विद्यालय भवन उद्घाटन गरिएको छ । आठबिसकोट नगरपालिका नगरप्रमुख रवि केसीले शुक्रवार उक्त भवन उद्घाटन गरेका हुन्। एक कार्यक्रमका विच विद्यालयको नवनिर्मित चार कोठे दुई वटा भवन उद्घाटन गरिएको हो । शुक्रवार औलिगाउँ र डाँफेमा रहेको भानुभक्त आधारभूत र जनज्योती आधारभूत विद्यालय भवनको उद्घाटन गरिएको हो । राष्ट्रपति शैक्षिक सुधार कार्यक्रम र आठबिसकोट नगरपालिकाको योजना अन्तर्गत ७३/७३ लाख लागतमा उक्त नवनिर्मित चार कोठे भवन निर्माण भएको विधालयले जनाएको छ ।
दुवै ठाउँको विद्यालय भवन निर्माण भएपछि पठन पाठनमा सहजता आउने स्थानीयले बताएका छन् । यस अघि विद्यालय भवन अपुग हुँदा बालबालिकालाई असजिलो तरिकाले पठन पाठन भैरहेको वडा नम्वर -७ का अध्यक्ष अमृत बुढाले बताए । उनले भने, यि दुबै ठाउँमा भवन अभाव थियो । नगरपालिकामा अनुरोध पछी एउटा भवन नगरपालिकाले बनाईदियो र अर्को भवन राष्ट्रपति शैक्षिक सुधार कार्यक्रम मार्फत निर्माण भयो । अब भने पठनपाठनमा सहज भएको छ । अध्यक्ष बुढाले विद्यालय भवन निर्माण पछी अब गुणस्तरिय शिक्षामा जोड दिन शिक्षकलाई आग्रह गरे ।
बाल विकास कक्षाको चार कोठे भवनले अब पढाईमा सजिलो हुने स्थानीय कर्ण केसीले जानकारी दिए । दुबै विद्यालय का लागि बनेको उक्त ४ कोठे भवनले पनि पठन पाठन तथा शैक्षिक गुणस्तरीयता कायम गर्न र नयाँ भवन बनेसँगै पठनपाठन र शैक्षिक विकासमा सहयोग पुग्ने अपेक्षा रहेको आठबिसकोटका नगरप्रमुख रवि केसीले बताए । शैक्षिक सामग्रीको व्यवस्थापन, विद्यार्थीका लागि कक्षा सञ्चालनका लागि नमूना विद्यालय अन्तर्गतको उक्त भवनले थप सहयोग केसीको भनाई छ । दुबै भवन निर्माणका लागि २०८० जेठमा शिलान्यास गरिएको थियो ।
