आठबिसकोट । रुकुम पश्चिमको आठबिसकोट नगरपालिकामा कार्यरत कर्मचारीहरुका लागि दुई दिने क्षमता विकास तालिम दिइएको छ । पालिकाको आयोजनामा १० र ११ माघमा भएको तालिममा आठबिसकोट नगरपालिका नगरकार्यपालिकाको कार्यालय अन्तर्गतका शाखा तथा उपशाखा प्रमुखहरु र वडा सचिवहरुको सहभागिता रहेको थियो ।
पालिका र वडा कार्यालयबाट प्रवाह हुने सेवाप्रवाहलाई प्रभावकारी बनाउने र योजना कार्यान्वयनमा गुणस्तरीयता ल्याउने सीप तथा अभिलेख व्यवस्थापन लगायतको विषयमा केन्द्रित गरी तालिम संचालन गरिएको थियो । तालिममा योजना तर्जुमा तथा व्यवस्थापन, स्थानीय राजस्व वृद्धिका उपायहरु, वडा कार्यलयमा देखिने कानुनी जटिलता र उपायहरु र व्यक्तिगत घटना दर्ता सामाजिक सुरक्षा सम्बन्धि कानुनी जटिलता र समाधानका उपायहरु का साथै सहभागीहरुलाई कम्प्युटरको आधारभूत जानकारी, प्रस्तुतीकरण निर्माण, इमेल इन्टरनेटको प्रयोगको विषयमा प्रशिक्षण दिईएको थियो ।
कार्यक्रममा प्रशिक्षक को रुपमा प्रदेश कोष तथा लेखा नियन्त्रक कार्यालय सुर्खेतका प्रमुख मदन मगराती र बिरेन्द्रनगर नगरपालिका का बरिष्ठ शाखा अधिकृत प्रकाश पौडेल रहेका छन । उक्त तालिममा नगरपालिका को कार्यालयमा कार्यरत कर्मचारी, बिभिन्न सेवा केन्द्रमा कार्यरत कर्मचारी र सबै वडा कार्यालयमा कार्यरत कर्मचारीहरु सहित ४७ जना को उपस्थिति रहेको छ ।
कार्यक्रममा सहभागीहरुले दैनिक कार्यालय संचालन र सेवा प्रवाहका लागि तालिमले सजिलो बनाएको प्रतिक्रिया दिए । तालिम ‘कन्टेण्ट’ अनुसार अवधि कम भएकोले यसलाई वृहत्त रुपमा संचालन गर्नुपर्ने सहभागीहरुको भनाइ थियो । कर्णाली प्रदेश प्रशिक्षण प्रतिष्ठानको सहकार्य र आठबिसकोट नगरपालिकाको आयोजनामा तालिम सञ्चालन भएको हो।
