आठबिसकोट । रुकुम पश्चिमको आठबिसकोट नगरपालिका-१० फलाटेमा रहेको सरस्वती आधारभूत विधालय अनिश्चितकालका लागी बन्द गरिएको छ । उक्त विधालयमा कार्यरत एक शिक्षकलाई नगरपालिकाले काजमा बोलाएर अहिले सम्म सो कोटा पुर्ती नगरेका कारण विधालय बन्द गरिएको हो ।
विधालय व्यवस्थापन समितिका अध्यक्ष विष्णु कुसारीका अनुसार विधालयमा कार्यरत शिक्षक खिमला खनाल बस्नेतलाई २०८१ असोज १० गतेको नगर कार्यपालिकाको निर्णय मार्फत शहिद स्मृति दिपज्योती नमुना मावि राडीमा काज सुरुवा गरेर हाल सम्म फिर्ता नगरेकाले विधालयमा पठनपाठन ठप्प भएको बताए। उनले भने विधालयमा शिक्षक नहुँदा बालबालिकाको पढाईमा गम्भिर असर परेको छ । नगरपालिकामा पटक पटक शिक्षक फिर्ता पठाउन वा कोटा पुर्ती गर्न अनुरोध गरेपनी वेवास्ता गरेका कारण बिधालय बन्द गर्न बाध्य भएका छौँ ।
विधालयमा शिक्षक नहुँदा पठनपाठनमा समस्या भएपछी मंसिर १२ गतेदेखि काजमा सरुवा भएका शिक्षक फिर्ता वा पदपुर्ती गरेर अन्य शिक्षक नपठाएसम्म अनिश्चितकालिन बन्द गरिएको एक सुचना मार्फत जानकारी दिइएको छ । नगरपालिकाले शिक्षकलाई अनुकुलता र सहज हुने ठाउँमा शिक्षकलाई काज सरुवा गरेर फिर्ता नपठाउँदा पठनपाठनमा समस्या हुने गरेको छ ।
त्यस्तै वडा नम्वर ९ स्थित कालिका मावि सुन्दर पानीमा कार्यरत शिक्षक जित बहादुर ओली पनी शहिद स्मृति दिपज्योती नमुना मावि राडीमा काज सरुवा भएको वर्षौ वितिसक्दा उनलाई हालसम्म फिर्ता पठाईएको छैन्। काज सरुवा गरेर आएका शिक्षक ओलि नमुना माविको प्रधानाध्यापक भएर काम गरिरहेका छन्।
नगरपालिकाले काजमा सरुवा गर्ने तर फिर्ता नपठाउने , अन्य पदपुर्ती समेत नगर्दा पालिकाको शिक्षा क्षेत्रमा गुणस्तर खस्कदै गएको बताईन्छ ।
