आठबिसकोट । महिला हिंसाविरुद्धको १६ दिने अभियान शुरु भएको छ । ‘घरैबाट शुरु गरौं, महिला हिंसा अन्त्य गरौं’ भन्ने मूल नाराका साथ सोमबारदेखि अभियान शुरू भएको हो ।
२०७५ साल मंसिर २ गते बसेको मन्त्रिपरिषद बैठकले नेपालमा मंसिरको ९ गतेदेखि २४ गतेसम्म सामाजिक सचेतनासहित लैंगिक हिंसाविरुद्घको अभियान सञ्चालन गर्न संघीय सरकारका मन्त्रालय तथा निकायहरु, ७ वटा प्रदेश सरकार, ७७ वटै जिल्ला समन्वय समिति, ७ सय ५३ स्थानीय तह एवं त्यसका वडाहरु सरोकारवाला निकायहरु, सामाजिक संघसंस्थाहरुलाई आह्वान गर्ने निर्णय गरेको थियो ।
सोही निर्णय अनुसार सबै निकायहरुले विभिन्न कार्यक्रमको आयोजना गरी लैंगिक हिंसाविरुद्वको १६ दिने अभियान सञ्चालन गरिएको रुकुम पश्चिमको आठबिसकोट नगरपालिकाका नगरउपप्रमुख धन कुमारी शाहीले बताइन्।
आठबिसकोट नगरपालिका ले आयोजना गरेको कार्यक्रममा बिभिन्न क्षेत्रका प्रतिनिधीहरु को उपस्थिति रहेको थियो । लैङ्गिक हिंसा न्युनिकरणमा स्थानीय तहको भुमिका विषयक वक्तृत्व कला प्रतियोगिता सहित पालिकाको १४ वटै वडाहरुमा कार्यक्रम सुरु गरिने उपप्रमुख शाहीले जानकारी दिइन्। कार्यक्रममा बोल्दै उपप्रमुख शाहीले महिलाविरुद्ध हुने सबै प्रकारका हिंसा अन्त्यका लागि कानुनमा उल्लेखित दण्ड र सजायको प्रभावकारी कार्यान्वयन गरिनुपर्ने बताइन्।
