रुकुम पश्चिम। रुकुम पश्चिमको आठबिसकोट नगरपालिका–३ का वडाध्यक्ष तथा नेपाली कम्युनिस्ट पार्टीका कर्णाली प्रदेश सदस्य केशरमान विकलाई प्रहरीले पक्राउ गरी कुटपिट गरेको आरोप लागेको छ। प्रहरी कार्यालयको हिरासतमा राखेर कुटपिट गरिएको भन्दै पार्टीले गम्भीर आपत्ति जनाएको छ ।
आज बिहान ९ बजेको समयमा जिल्ला प्रहरी कार्यालयमा वडासँग सम्बन्धित विषयमा छलफल गर्नुपर्ने भन्दै बोलाईएको र कार्यालय परिसरमा पुगेलगत्तै विना पक्राउ पुर्जी हत्कडी लगाएर हिरासतमा राखी कुटपिट गरिएको आरोप लगाएको छ । नेपाली कम्युनिष्ट पार्टी रुकुम पश्चिम जिल्ला समितिले प्रेस विज्ञप्ति जारी गर्दै हिरासतमा राखेर कुटपिट गरिएको भन्दै गम्भीर आपत्ती जनाएको हो ।
पार्टीका जिल्ला संयोजक गोविन्द रोका र सह संयोजक सुरज परियाले जारी गरेको विज्ञप्ति अनुसार कुटपिटबाट वडा अध्यक्ष विकको टाउको, अनुहार र घाँटीमा चोट लागेको छ । सामाजिक सञ्जालमा सार्वजनिक भएको भिडियोमा समेत उहाँको शरीरका विभिन्न भागमा चोट देखिएको विज्ञप्तिमा उल्लेख गरिएको छ ।
जनताको सुरक्षा गर्ने जिम्मेवारी बोकेको प्रहरीबाटै जनप्रतिनिधिमाथि अमानवीय तथा गैरकानुनी व्यवहार भएको भन्दै पार्टीले घटनाको निन्दा गरेको छ । लोकतन्त्र, कानुनी शासन र मानव अधिकारको सम्मान गर्दै घटनाको तत्काल छानबिन हुनुपर्ने पार्टीको माग छ । पार्टीले वडा अध्यक्ष विकलाई तत्काल निःशर्त रिहा गर्न, निःशुल्क स्वास्थ्य उपचारको व्यवस्था गर्न र कुटपिटमा संलग्न प्रहरीमाथि तत्काल कानुनी कारबाही गर्न सरकारसँग माग गरेको छ ।
नेकपा जिल्ला कमिटीले गैरकानुनी रूपमा हिरासतमा राखिएका वडाध्यक्ष विकलाई तत्काल रिहा गर्न, उनको निःशुल्क स्वास्थ्य उपचारको व्यवस्था गर्न तथा कुटपिटमा संलग्न प्रहरीमाथि कानुनी कारबाही गर्न सरकारसँग माग गरेको छ।
त्यस्तै, विकमाथि झुटा मुद्दा लगाउने वा अन्य कुनै बहानामा दुःख दिने प्रयास भए त्यसको सशक्त प्रतिवाद गर्ने चेतावनीसमेत पार्टीले दिएको छ। घटनाको जिम्मेवारी सरकारले लिनुपर्ने माग गर्दै पार्टीले आगामी दिनमा यस्ता घटना दोहोरिन नदिन मानवअधिकारकर्मी, सञ्चारकर्मी तथा आम बुद्धिजीवीसमक्ष आग्रह गरेको छ।
