भोटेकोसी बाढीबाट क्षतिग्रस्त संरचनाको पुनर्निर्माणका लागि प्रारम्भिक रूपमा ८ देखि ९ खर्ब रुपैयाँसम्म खर्च लाग्ने अनुमान गरिएको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले गठन गरेको विस्तृत क्षति मूल्यांकन समितिले बाढीबाट भएको क्षति, तत्काल पुनर्निर्माण र दीर्घकालीन आवश्यकताको मूल्यांकन गरिरहेको छ। समितिका संयोजक अर्जुन भण्डारीका अनुसार सोमबार सरोकारवाला निकायसँग छलफल गरेर विस्तृत विवरण सार्वजनिक गर्ने तयारी भइरहेको छ।
प्राधिकरणका अनुसार बाढीबाट निजी तथा सरकारी पूर्वाधारमा मात्रै करिब ४ खर्ब रुपैयाँ बराबरको क्षति पुगेको छ। समितिका एक सदस्यका अनुसार तत्काल पुनर्निर्माणका लागि ८ देखि ९ खर्ब रुपैयाँ आवश्यक पर्ने देखिएको हो। दीर्घकालीन पुनर्निर्माणमा भने योभन्दा बढी खर्च लाग्न सक्ने अनुमान गरिएको छ।
सडक तथा पुल पुनर्निर्माणका लागि मात्रै करिब ५० अर्ब रुपैयाँ आवश्यक पर्ने सडक विभागका महानिर्देशक डा. विजय जैसीले बताएका छन्। बाढीबाट ४२ वटा पुल र करिब ४० किलोमिटर सडकमा क्षति पुगेको छ।
त्यस्तै, सहरी विकास तथा भवन निर्माण विभागका महानिर्देशक रवीन्द्र बोहराका अनुसार क्षतिग्रस्त भवन पुनर्निर्माणका लागि करिब १० अर्ब रुपैयाँ लाग्ने अनुमान छ। रसुवा, नुवाकोट, धादिङ, गोरखा र चितवनका १५ स्थानीय तहमा गरी ७ हजार ५७० सरकारी तथा निजी भवनमा क्षति पुगेको छ।
खानेपानी तथा ढल व्यवस्थापन विभागका अनुसार बाढीले चार जिल्लाका ५५ वटा खानेपानी आयोजनामा क्षति पुर्याएको छ। ती आयोजनामा करिब ६ करोड ४० लाख रुपैयाँ बराबरको क्षति भएको विभागको प्रारम्भिक विवरण छ।
समितिले बाढीबाट भएको हालको क्षति, तत्काल पुनर्निर्माणको आवश्यकता र दीर्घकालीन पुनर्निर्माणको आवश्यकता गरी तीन चरणमा विवरण तयार गरिरहेको छ। विस्तृत मूल्यांकनपछि पुनर्निर्माणका लागि आवश्यक स्रोत र योजनाबारे थप स्पष्ट हुने अपेक्षा गरिएको छ।
