जाजरकोट। जाजरकोटको नलगाड नगरपालिका–१० र ११ को सीमाक्षेत्र ताक्सुगाडमा बाढीले बगाएको भेरी करिडोरअन्तर्गतको सडक नौ दिनपछि सञ्चालनमा आएको छ। बाढीले सडकसँगै पुल र चारवटा घर बगाएपछि अवरुद्ध बनेको जाजरकोट–डोल्पा सडकखण्ड नलगाड नगरपालिकाको समन्वयमा भेरी करिडोर सडक योजनाले मर्मत तथा निर्माण गरेपछि यातायातका लागि खुलाइएको हो।
ताक्सुगाडमा आएको बाढीले सडक संरचनामा ठूलो क्षति पुर्याउनुका साथै पुलसमेत बगाएपछि जाजरकोटबाट डोल्पातर्फ जाने यातायात सेवा पूर्ण रूपमा प्रभावित भएको थियो। सडक अवरुद्ध हुँदा स्थानीय बासिन्दा, यात्रु तथा दैनिक उपभोग्य सामग्री बोकेका सवारीसाधन बाटोमै रोकिएका थिए।
नलगाड नगरपालिकाको समन्वयमा भेरी करिडोर सडक योजनाले तत्काल मर्मतको काम अघि बढाएर सवारीसाधन सञ्चालन गर्न मिल्ने अवस्था बनाएपछि सडक खुलेको हो। सडक सञ्चालनमा आएसँगै जाजरकोटबाट डोल्पाको त्रिपुराकोट, छलगाडलगायतका क्षेत्रमा जाने सवारीसाधन पुनः चल्न थालेका छन्।
लामो समयसम्म सडक अवरुद्ध हुँदा समस्यामा परेका यात्रु तथा स्थानीयलाई सडक खुलेपछि केही राहत मिलेको नलगाड–१२ का तेजबहादुर विकले बताए। सडक अवरुद्ध हुँदा खाद्यान्न, औषधि तथा दैनिक उपभोग्य सामग्रीको ढुवानीसमेत प्रभावित भएको थियो।
बाढीले ताक्सुगाडमा सडक र पुलमा मात्रै क्षति पुर्याएको छैन। रोली ज्यूलामा ल्याइएको नहरमा समेत ठूलो क्षति पुगेको छ। नहर क्षतिग्रस्त भएपछि स्थानीयको सिँचाइ सुविधामा समेत असर परेको छ।
नहर पुनर्निर्माणका लागि नगरपालिकाले लागत अनुमान तयार गरी प्रदेश सरकारको खानेपानी, सिँचाइ तथा ऊर्जा विकास कार्यालयमार्फत निर्माण गर्ने तयारी गरेको नगरप्रमुख डम्बर रावतले जानकारी दिए। उनका अनुसार बाढीबाट क्षतिग्रस्त संरचनाको तत्काल मर्मतसँगै दीर्घकालीन रूपमा सुरक्षित संरचना निर्माण गर्न आवश्यक छ।
वर्षायाममा पानीको बहाव बढ्दा सडक तथा नहरमा पटक–पटक क्षति हुने भएकाले आगामी दिनमा बाढीको जोखिमलाई ध्यानमा राखेर संरचना निर्माण गर्नुपर्ने उनले बताए।
ताक्सुगाडमा सडक खुले पनि यातायात पूर्ण रूपमा सुरक्षित भने भइसकेको छैन। ताक्सुगाड खोलामा पानीको मात्रा बढेपछि सडक पुनः अवरुद्ध हुने जोखिम कायमै रहेको स्थानीयले बताएका छन्। माथिल्लो क्षेत्रमा वर्षा हुँदा एक्कासि खोलामा पानीको बहाव बढ्ने भएकाले सडकमा समस्या दोहोरिने गरेको छ।
भेरी करिडोरअन्तर्गत पर्ने विभिन्न खोलामा पानीको बहाव बढ्दा वर्षायाममा सडक सञ्चालनमा समस्या हुँदै आएको छ। सडक निर्माण भए पनि कतिपय स्थानमा स्थायी पुल तथा कल्भर्ट निर्माण नहुँदा सवारीसाधनले जोखिम मोलेर आवतजावत गर्नुपर्ने अवस्था छ। अहिले ताक्सुगाडमा सडक सञ्चालनमा आए पनि ठूलो वर्षा भएमा पुनः सडक अवरुद्ध हुन सक्ने जोखिम रहेको स्थानीयको भनाइ छ।
भेरी करिडोरको अर्को चुनौती छलगाडमा पुल नहुनु पनि हो। भेरी करिडोरले जाजरकोटलाई डोल्पासँग जोडेको भए पनि सडकखण्डका केही स्थानमा पुल निर्माण नहुँदा वर्षायाममा नियमित यातायात सञ्चालन गर्न कठिन हुँदै आएको छ। पानीको बहाव कम भएका बेला जाजरकोटबाट डोल्पाको त्रिपुराकोट हुँदै छलगाडसम्म सवारीसाधन सञ्चालन हुने गरे पनि वर्षायाममा खोलामा पानी बढेपछि यातायात रोकिने गरेको छ।
छलगाडमा आवश्यक पुल नहुँदा डोल्पाको सदरमुकाम दुनैसम्म नियमित रूपमा यातायात सञ्चालन गर्नसमेत समस्या हुने गरेको छ। कतिपय अवस्थामा यात्रुले सवारीसाधनबाट ओर्लिएर पैदल जोखिमपूर्ण रूपमा खोला पार गर्नुपर्ने अवस्था आउने गरेको स्थानीय बताउँछन्।
भेरी करिडोर डोल्पाका नागरिकका लागि प्रदेश राजधानी सुर्खेतसहित अन्य जिल्लासँग जोडिने महत्वपूर्ण सडक हो। सडकमा समस्या आउँदा डोल्पाका अधिकांश क्षेत्रमा दैनिक जीवन प्रभावित हुने गरेको छ। त्यसैले ताक्सुगाडसहित भेरी करिडोरका जोखिमयुक्त स्थानमा स्थायी पुल तथा सुरक्षित सडक संरचना निर्माण गर्नुपर्ने माग स्थानीयले गर्दै आएका छन्।
भेरी करिडोरअन्तर्गतका पाँचवटा पुल निर्माणका लागि क्याराभान हिराचन जेभीले ठेक्का लिएको छ। उक्त कम्पनीले २०७७ माघ २ गते जाजरकोटको नलगाड र झुर्मेखोलाको पक्की पुल निर्माणका लागि १८ करोड ४३ लाख ४३ हजार रुपैयाँमा ठेक्का लिएको थियो।
सोही कम्पनीले त्रात्रखोला, मैदेखोला र ताक्सुगाड चौखाको पुल निर्माणको ठेक्का पनि लिएको छ। ती पुलको ठेक्का रकम करिब १३ करोड ५४ लाख रुपैयाँ रहेको छ। भेरी करिडोरका महत्वपूर्ण संरचना मानिएका यी पुलको निर्माण कार्य भने अझै पूरा हुन सकेको छैन।
जाजरकोटदेखि डोल्पासम्मको भेरी करिडोर सडकको लम्बाइ करिब ११८ किलोमिटर छ। यस सडकले जाजरकोटसँगै डोल्पाका विभिन्न स्थानीय तहलाई सडक सञ्जालसँग जोडेको छ। सडक निर्माण तथा स्तरोन्नतिसँगै डोल्पाका नागरिकको यातायात पहुँच सहज भए पनि बाढीपहिरो र पुल अभावका कारण नियमित यातायात अझै चुनौतीपूर्ण बनेको छ।
वर्षायाममा सडकखण्डमा पर्ने खोलाहरूमा पानीको बहाव बढ्दा यातायात बन्द हुने र हिउँदमा सडक सञ्चालन सहज हुने गरेको छ। सडक अवरुद्ध हुँदा डोल्पामा खाद्यान्न, निर्माण सामग्री, औषधि तथा अन्य आवश्यक सामग्री ढुवानीमा समेत प्रत्यक्ष असर पर्ने गरेको छ।
ताक्सुगाडको सडक नौ दिनपछि खुलेसँगै जाजरकोट–डोल्पा सडकखण्डमा यातायात सेवा पुनः सञ्चालन भएको छ। तर बाढीले क्षति पुर्याएका पुल, नहर र सडक संरचनाको स्थायी समाधान नगरेसम्म वर्षायाममा यातायात अवरोध दोहोरिने जोखिम कायमै रहने देखिएको छ।
स्थानीय तह, प्रदेश सरकार र भेरी करिडोर सडक योजनाले दीर्घकालीन योजना बनाएर जोखिमयुक्त स्थानमा स्थायी पुल, कल्भर्ट तथा सुरक्षित सडक संरचना निर्माण गर्नुपर्ने स्थानीयको माग छ।
