लागु औषध नियन्त्रण ब्युरोको टोलीले बाँकेको नेपालगन्जबाट भारी मात्रामा अवैध लागु औषध खैरो हेरोइनसहित दुई जना महिलालाई पक्राउ गरेको छ।
(हिजो) बुधवार लागु औषध नियन्त्रण ब्युरो शाखा कार्यालय नेपालगन्जबाट खटिएको प्रहरी टोलीले नेपालगन्ज उपमहानगरपालिका वडा-१८ बाट अवैध लागु औषध खैरो हेरोइन खरिद बिक्री गरिरहेको अवस्थामा उनीहरूलाई नियन्त्रणमा लिएको हो।
पक्राउ पर्नेमा रुकुम पश्चिम मुसिकोट नगरपालिका वडा–१ ३३ बर्षिया ललिता बुढाथोकी र बाँके जिल्ला नेपालगन्ज उपमहानगरपालिका वडा–१८ २४बर्षिया निशा मगर रहेका छन् । प्रहरीले उनीहरूको साथमा अवैध लागु औषध खैरो हेरोइन ४ सय ग्राम र मोबाइल ३ थान बरामद गरेको हो ।
पक्राउ परेका दुवै जनालाई आवश्यक अनुसन्धान तथा कानुनी कारबाहीका लागि जिल्ला प्रहरी कार्यालय बाँकेमा बुझाइएको लागु औषध नियन्त्रण ब्युरोका सह–प्रवक्ता एवं प्रहरी नायव उपरीक्षक जीवन निरौलाले जानकारी दिए ।
