रुकुम पश्चिम। रुकुम पश्चिम प्रहरीले लागूऔषध (ब्राउन सुगर) जस्तो देखिने पदार्थसहित दुई जनालाई पक्राउ गरेको छ। जिल्ला प्रहरी कार्यालय रुकुम (पश्चिम) का अनुसार सोमबार राति करिब ९ बजे त्रिवेणी गाउँपालिका–२ सिम्रुतु बजार क्षेत्रमा नियमित गस्ती तथा चेकजाँचका क्रममा शंकास्पद अवस्थामा रहेको मोटरसाइकल रोकेर जाँच गर्दा लागूऔषध बरामद भएको हो।
प्रहरीले भे १२ प ५८३० नम्बरको मोटरसाइकलमा सवार सोही वडाका स्थानीय २९ वर्सिय युवा कमल पुन मगर र २० वर्षका राजन पुन मगरलाई नियन्त्रणमा लिएको जनाएको छ। उनीहरूको साथबाट लागूऔषध (ब्राउन सुगर) जस्तो देखिने पदार्थ फेला परेको प्रहरीले जनाएको छ।
बरामद गरिएको पदार्थको शुद्ध तौल ७० मिलिग्राम रहेको छ। साथै घटनामा प्रयोग भएको मोटरसाइकल समेत प्रहरीले नियन्त्रणमा लिएको छ।
पक्राउ परेका दुवै जनाविरुद्ध लागूऔषध सम्बन्धी कसुरमा अनुसन्धान अघि बढाइएको छ। जिल्ला अदालत रुकुम पश्चिमबाट पाँच दिनको म्याद थप अनुमति लिएर थप अनुसन्धान भइरहेको जिल्ला प्रहरी कार्यालयले जनाएको छ। लागूऔषध नियन्त्रण तथा अवैध ओसारपसार रोकथामका लागि प्रहरीले जिल्लाभर निगरानी र चेकजाँचलाई थप कडा बनाएको बताएको छ।
