रुकुम पश्चिम । जिल्लामा बढ्दो आत्महत्याका घटनालाई मध्यनजर गर्दै आत्महत्या न्यूनीकरणका लागि सरोकारवाला निकायहरूको भूमिका स्पष्ट पार्ने उद्देश्यले बुधबार अन्तरक्रिया कार्यक्रम सम्पन्न भएको छ।
जिल्ला प्रहरी कार्यालय रुकुम पश्चिमको आयोजनामा तथा प्रमुख जिल्ला अधिकारी निशानराज गौतमको प्रमुख आतिथ्यतामा आयोजित कार्यक्रममा स्थानीय तहका प्रमुख प्रशासकीय अधिकृत, जिल्ला सुरक्षा समितिका पदाधिकारी, जिल्ला अस्पतालका चिकित्सक तथा मनोपरामर्शकर्ता, जनप्रतिनिधि, विद्यालयका प्रधानाध्यापक, विभिन्न संघसंस्थाका प्रतिनिधि, सञ्चारकर्मी लगायत सम्बन्धित क्षेत्रका सरोकारवाला निकायहरूको सहभागिता रहेको थियो।
कार्यक्रममा जिल्ला प्रहरी कार्यालयरुकुम पश्चिमका प्रमुख प्रहरी नायव उपरीक्षक बेदबहादुर पौडेलले जिल्लामा आत्महत्याको वर्तमान अवस्था, यसका प्रमुख कारण तथा आत्महत्या न्यूनीकरणका लागि सरोकारवाला निकायहरूले निर्वाह गर्नुपर्ने भूमिकाबारे प्रस्तुतीकरण गर्नुभएको थियो।
त्यस्तै कार्यक्रमका प्रमुख अतिथि प्रमुख जिल्ला अधिकारी निशानराज गौतमले आत्महत्या केवल व्यक्तिगत समस्या नभई सामाजिक, पारिवारिक तथा मानसिक स्वास्थ्यसँग जोडिएको गम्भीर विषय भएको बताउनुभयो। उहाँले आत्महत्या न्यूनीकरणका लागि सरकारी निकाय, स्थानीय तह, शैक्षिक संस्था, स्वास्थ्य संस्था, सञ्चारमाध्यम तथा समुदायबीच प्रभावकारी समन्वय र सहकार्य आवश्यक रहेको उल्लेख गर्नुभयो।
सहभागीहरूले आत्महत्या रोकथामका लागि जनचेतना अभिवृद्धि, मानसिक स्वास्थ्य सेवाको पहुँच विस्तार, विद्यालय तथा समुदायस्तरमा परामर्श सेवाको प्रभावकारी सञ्चालन, तथा विभिन्न निकायबीच समन्वय र सहकार्यलाई थप सुदृढ बनाउनुपर्नेमा जोड दिएका थिए।
कार्यक्रमले आत्महत्या न्यूनीकरणका लागि सम्बन्धित निकायहरूबीच साझा समझदारी र सहकार्यको वातावरण निर्माण गर्न महत्वपूर्ण योगदान पुर्याएको आयोजकले जनाएको छ।
