रुकुम पश्चिमको आठबिसकोट रेडियो नयाँ नेपाल चोके देखि इलाका प्रहरी कार्यालय, आठबिसकोट नगरपालिका ९ जोड्ने भित्री सडक खण्ड अन्तर्गत निर्माण कार्य भइरहेको क्षेत्रमा विवाद उत्पन्न भएपछि आठबिसकोट नगरपालिकाले सडकको मापदण्डअनुसार घरटहरा भत्काएको छ।
नगरपालिकाका अनुसार सडक विस्तार तथा स्तरोन्नति कार्यलाई प्रभावकारी रूपमा अगाडि बढाउन सडकको निर्धारित मापदण्डभित्र परेका संरचना हटाउने अभियान सञ्चालन गरिएको हो। सोही क्रममा केही घरटहरा सडक क्षेत्रभित्र परेको भन्दै भत्काइएको जनाइएको छ।
स्थानीय बासिन्दा र सम्बन्धित पक्षबीच संरचना हटाउने विषयमा विवाद उत्पन्न भए पनि नगरपालिकाले कानुनी प्रक्रिया र सडक मापदण्डअनुसार काम गरिएको जनाएको छ। नगरपालिकाले सडक निर्माण कार्यमा अवरोध नहोस् र सार्वजनिक हितलाई प्राथमिकता दिँदै संरचना हटाइएको स्पष्ट पारेको छ।
उक्त सडक खण्डको निर्माण सम्पन्न भएपछि स्थानीयवासीलाई आवतजावतमा सहजता हुने तथा क्षेत्रको समग्र विकासमा टेवा पुग्ने अपेक्षा गरिएको छ। सडक निर्माण तथा विस्तारको काम जारी रहेको नगरपालिकाले जनाएको छ।
