आठबिसकोट, रुकुम पश्चिम । ग्रामीण स्वास्थ्य सेवा सुदृढीकरण गर्ने उद्देश्यका साथ ग्रामीण स्वास्थ्य प्रणाली सुदृढीकरण परियोजना (Rural Health System Strengthening Project–RHSSP) अन्तर्गत Nick Simons Foundation International (NSFI), USA र आठबिसकोट नगरपालिकाबीच पूर्वसहमति भएको छ। उक्त परियोजना आगामी आर्थिक वर्षको श्रावण १ गतेदेखि कार्यान्वयनमा आउने भएको छ।
सम्झौताअनुसार पाँच वर्षसम्म सञ्चालन हुने यस परियोजनामा करिब साढे सात करोड रुपैयाँ लगानी हुने जनाइएको छ। परियोजनामार्फत आठबिसकोट नगर अस्पतालमा एमडीजीपी (MDGP), मेडिकल अफिसर, नर्स, एनेस्थेसिया सहायक तथा प्यारामेडिक्स लगायतका दक्ष स्वास्थ्यकर्मी नियुक्त गरिनेछ।
परियोजना कार्यान्वयनसँगै नगर अस्पतालबाट शल्यक्रिया सेवा, आपतकालीन उपचार सेवा तथा व्यापक प्रसूति एवं नवजात शिशु सेवा (CEONC) उपलब्ध हुने अपेक्षा गरिएको छ। यसले विशेषगरी ग्रामीण क्षेत्रका गर्भवती महिला तथा नवजात शिशुलाई गर्भावस्थादेखि जन्मपछिसम्म आवश्यक स्वास्थ्य सेवा सहज रूपमा प्राप्त हुने विश्वास लिइएको छ।
नगर प्रमुख रवि केसीका अनुसार अनुसार परियोजनाले मातृ तथा नवजात शिशु मृत्यु दर न्यूनीकरण गर्न महत्वपूर्ण योगदान पुर्याउनेछ। साथै उपचारका लागि नगर अस्पतालबाट अन्यत्र रिफर गर्नुपर्ने बिरामीको संख्या पनि उल्लेखनीय रूपमा घट्ने अपेक्षा गरिएको छ। प्रमुख केसीले भने,“आठबिसकोट नगरपालिकाका नागरिकलाई गुणस्तरीय स्वास्थ्य सेवा आफ्नै नगरभित्र उपलब्ध गराउने हाम्रो लक्ष्यमा यो परियोजना कोशेढुंगा सावित हुनेछ। विशेषगरी गर्भवती आमा र नवजात शिशुको स्वास्थ्य सुरक्षामा यसले महत्वपूर्ण परिवर्तन ल्याउनेछ। आगामी पाँच वर्षमा नगर अस्पताललाई थप सक्षम र विश्वासिलो स्वास्थ्य संस्थाका रूपमा विकास गर्न यो कार्यक्रम प्रभावकारी बन्नेछ।”
परियोजनाले मातृ तथा शिशु स्वास्थ्य सेवामा मात्र नभई समग्र स्वास्थ्य प्रणालीको गुणस्तर अभिवृद्धि, स्वास्थ्य सेवामा पहुँच विस्तार तथा स्थानीय स्तरमै विशेषज्ञ सेवा उपलब्ध गराउन महत्वपूर्ण भूमिका खेल्ने विश्वास नगरपालिकाले व्यक्त गरेको छ।
