नेपाल शिक्षक संगठन जिल्ला समन्वय समिति रुकुम पश्चिमले एक विज्ञप्ति जारी गर्दै घाइते अवस्थामा रहेका शिक्षकलाई हटाएर नयाँ शिक्षक भर्ना प्रक्रिया अघि बढाइएको प्रति गम्भीर आपत्ति जनाएको छ।
संगठनका अनुसार मुसिकोट स्थित त्रिपुरा माध्यमिक विद्यालय छिबाङमा कार्यरत विज्ञान शिक्षक चन्द्रबहादुर खड्काले राष्ट्रपति रनिङ शिल्ड प्रतियोगिताको तयारीका क्रममा दुर्घटनामा परी खुट्टामा गम्भीर चोट लागेको थियो । हाल उनको जटिल शल्यक्रियापछि उपचार भइरहेको र हिँडडुल गर्न नसक्ने अवस्थामा रहेको विज्ञप्तिमा उल्लेख छ।
यसैबीच विद्यालय व्यवस्थापन समिति, प्रधानाध्यापक तथा शिक्षा युवा तथा खेलकुद शाखा मुसिकोटले ती शिक्षकलाई हटाएर नयाँ शिक्षक पदपूर्तिका लागि विज्ञापन गरेको भन्दै संगठनले विरोध जनाएको हो।
संगठनले यस्तो कदमलाई “अमानवीय र पशुवत्” निर्णयको संज्ञा दिँदै तत्काल निर्णय सच्याउन सम्बन्धित पक्षसँग माग गरेको छ। साथै घाइते शिक्षकप्रति अन्याय हुने गतिविधिको विरोधमा शिक्षक समुदाय, नागरिक समाज र सञ्चारकर्मीलाई समेत आवाज उठाउन अपिल गरिएको छ।
नेपाल शिक्षक संगठन जिल्ला समन्वय समिति रुकुम पश्चिमका अध्यक्ष शेरबहादुर केसीद्वारा हस्ताक्षरित विज्ञप्तिमा शिक्षकमाथि अन्यायपूर्ण व्यवहार नगर्न सम्बन्धित निकायलाई चेतावनीसमेत दिइएको छ।
