डोल्पा जिल्लामा यार्सागुम्बा संकलनका लागि आगामी जेठ १० गतेदेखि पाटन क्षेत्र खुला गरिने निर्णय गरिएको छ । सदरमुकाम दुनैमा बसेको सर्वपक्षीय तथा सर्वदलीय बैठकले एक महिनाको अवधिका लागि यार्सापाटन खुला गर्ने सहमति गरेको हो ।
शे-फोक्सुण्डो राष्ट्रिय निकुञ्जका निमित्त प्रमुख विज्ञान सेनका अनुसार यस वर्ष अघिल्लो वर्षको तुलनामा केही ढिलो गरी पाटन खोल्ने निर्णय गरिएको हो । बैठकले निकुञ्ज क्षेत्र तथा डिभिजन वन अन्तर्गत पर्ने सबै पाटन सर्वसाधारणका लागि खुला गर्ने निष्कर्ष निकालेको छ ।
यार्सागुम्बा संकलनका लागि प्रवेश अनुमति तीन तहमा वर्गीकरण गरिएको छ । निकुञ्जको मध्यवर्ती क्षेत्रभित्र बसोबास गर्ने स्थानीयका लागि ‘क’ वर्गअन्तर्गत पाँच सय रुपैयाँ, डोल्पा जिल्लाभित्रका नागरिकका लागि ‘ख’ वर्गअन्तर्गत दुई हजार रुपैयाँ र जिल्ला बाहिरका व्यक्तिका लागि ‘ग’ वर्गअन्तर्गत तीन हजार रुपैयाँ शुल्क तोकिएको छ । मध्यवर्ती तथा जिल्लाभित्रका नागरिकले अनिवार्य रूपमा परिचयपत्र पेश गर्नुपर्ने व्यवस्था गरिएको छ ।
संकलनमा सहभागी हुन चाहनेले जेठ ५, ६ र ७ गते सम्बन्धित पाटन क्षेत्रमा पुगेर शुल्क बुझाउनुपर्नेछ । साथै १६ वर्षमुनिका बालबालिकालाई पाटन क्षेत्रमा प्रवेशमा विशेष नियन्त्रण गरिने जनाइएको छ ।
सुरक्षालाई मध्यनजर गर्दै आवश्यक परेमा नेपाल सेना, सशस्त्र प्रहरी बल, राष्ट्रिय अनुसन्धान तथा नेपाल प्रहरी परिचालन गर्ने निर्णय पनि बैठकले गरेको छ ।
निकुञ्ज प्रशासनका अनुसार पाटन क्षेत्रमा गस्तीका लागि कर्मचारी तथा सुरक्षाकर्मी परिचालन भइसकेका छन् । तोकिएको समयभन्दा अगाडि प्रवेश गर्ने व्यक्तिमाथि कानुनी कारबाही गरिने चेतावनीसमेत दिइएको छ । हरेक वर्ष डोल्पाका हिमाली पाटनमा यार्सागुम्बा संकलनका लागि ठूलो संख्यामा सर्वसाधारण पुग्ने गरेका छन् ।
