रुकुम पश्चिमको आठबिसकोट नगरपालिकाले जाजरकोट भूकम्पबाट प्रभावित नागरिकहरूको निजी आवास पुनर्निर्माणका लागि पहिलो किस्ता रकम निकासा गर्न अनुरोध गरेको छ। नगर प्रमुख रवि केसीले जिल्ला प्रशासन कार्यालय, रुकुम (पश्चिम भाग) लाई पत्राचार गर्दै विपद् प्रभावित निजी आवास प्रबलीकरण, पुनर्निर्माण तथा पुनर्स्थापन अनुदान कार्यविधि २०८१ अनुसार पहिलो किस्ता उपलब्ध गराउन आग्रह गरेका हुन् ।
स्थानीय विपद् व्यवस्थापन समितिको बैठकको निर्णयअनुसार नगरपालिकाले विभिन्न वडाका लाभग्राहीका लागि कुल ६ करोड ८३ लाख रुपैयाँ निकासा माग गरेको जनाएको छ।
प्राप्त विवरणअनुसार नगरका विभिन्न वडाबाट कुल १,३६६ जना लाभग्राही रहेका छन्। ती लाभग्राहीलाई पहिलो किस्ता वितरणका लागि रकम आवश्यक भएको भन्दै निकासा प्रक्रिया अघि बढाइएको हो। नगरपालिकाले प्रभावित नागरिकलाई छिटो राहत तथा पुनर्निर्माण प्रक्रिया अघि बढाउन सम्बन्धित निकायसँग सहकार्य गरिरहेको जनाएको छ।
यस अघि पनि पटक पटक राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई भुकम्प पछिको पुननिर्माणका लागि अनुरोध गर्दा पनि सुनुवाई नभएपछि मेयर केसीले गृह मन्त्रालय मार्फत निवेदन दिएका थिए।
त्यस्तै पुन निर्माण तत्काल सुरु गर्नको लागी जिल्ला प्रशासन लाई ध्यानआकर्षण गराएको छ। प्रमुख जिल्ला अधिकारी समक्ष नगर प्रमुख रवि केसीले ध्यानआकर्षण पत्र बुझाउँदै भुकम्प गएको २९ महिना पुगिसक्दा पनि पुन निर्माण हुन नसकेको भन्दै तत्काल पहिलो किस्ता वापतको रकम निकासा गर्न उल्लेख गरिएको छ।
