रुकुम पश्चिमको बाफिकोट गाउँपालिका–८ दुलीमैनेरीमा १६ वर्षीया दिलमाया खत्री आफ्नै घर नजिक सालको रुखमा पासो लगाएको अवस्थामा मृत फेला परेकी छन्। स्थानीयका अनुसार घटना आज बिहान तिर भएको हो।
घटनापछि प्रहरीले शव नियन्त्रणमा लिएर पोस्टमार्टमका लागि जिल्ला अस्पताल सल्ले स्थित पठाएको जनाएको छ।
जिल्ला प्रहरी कार्यालय रुकुम पश्चिमका अनुसार आज बिहान करिब १०:३० बजे मृतकका परिवार बाट जाहेरी दर्ता गर्न आएको र सोही आधारमा थप अनुसन्धान तथा पोस्टमार्टम प्रक्रिया अगाडि बढाइने प्रहरीले जनाएको छ।
प्रहरीका अनुसार प्रारम्भिक रूपमा घटनास्थलमा शंकास्पद कुनै वस्तु वा संकेत फेला परेको छैन। तर, स्थानीय बासिन्दाका अनुसार विगत करिब तीन वर्षदेखि सोही गाउँका छिमेकी अन्दाजी २५–२७ वर्षका एक पुरुषबाट यौन शोषण भएको तथा करिब १५–२० दिनअघि उनीहरू बिच झडप भएको बुझिएको छ ।
प्रहरीले घटनासम्बन्धी तथ्यहरू संकलन गर्दै सम्बन्धित व्यक्तिहरूसँग सोधपुछ गरिरहेको जनाएको छ। पोस्टमार्टम रिपोर्टपछि घटनाको वास्तविक कारणबारे थप स्पष्ट हुने अपेक्षा गरिएको छ।
