रुकुम पश्चिम। नेपाली कांग्रेसका नेता मान बहादुर नेपालीले पार्टीभित्र भएको पछिल्लो राजनीतिक घटनाक्रमप्रति असन्तुष्टि जनाउँदै पार्टी परित्याग गर्ने घोषणा गरेका छन्। उनले सामाजिक सञ्जालमार्फत आफ्नो धारणा सार्वजनिक गर्दै पार्टी नेतृत्वको कार्यशैलीप्रति गम्भीर असन्तुष्टि व्यक्त गरेका हुन्।

नेपालीले फागुन २१ को निर्वाचन र त्यसअघिको प्रक्रियामा पार्टीभित्र अराजकता र गैरवैधानिक गतिविधि भएको आरोप लगाएका छन्। उनले नेपाली कांग्रेसका सभापति शेर बहादुर देउवाको हस्ताक्षरमा समानुपातिकतर्फ दलित कोटामा पुरुषतर्फ नम्बर १ मा उम्मेदवारी परेको विषय सबैलाई जानकारी भए पनि निर्वाचनको मुखमा पार्टीभित्र असामान्य गतिविधि भएको दाबी गरेका छन्।

उनले तत्कालीन महामन्त्री हालका सभापति गगन कुमार थापा प्रति संकेत गर्दै पार्टी कब्जा गर्ने खेल लोकतन्त्र र देशविरुद्धको षड्यन्त्र जस्तो देखिएको टिप्पणी गरेका छन्। साथै, “मुख होइन, रुखलाई भोट हाल्ने” पार्टी नीतिअनुसार कार्यकर्ताहरूले अपमान सहेर पनि देशभर परिचालन भएर पार्टीलाई ठूलो मत दिलाएको उनले उल्लेख गरेका छन्।

नेपालीले आफू २०४९ सालदेखि सक्रिय रूपमा पार्टी राजनीतिमा लागिरहेको बताउँदै पार्टीभित्र न्याय र अन्यायका निर्णयहरू भए पनि अहिलेको अवस्था कांग्रेसी संस्कारभन्दा बाहिर गएको बताएका छन्। उनले पार्टी नेतृत्वले संवाद र सहमतिमार्फत समस्या समाधान गर्नुपर्नेमा त्यसो हुन नसकेको आरोप लगाएका छन्।

रुकुम पश्चिममा भएको निर्वाचनमा अन्तर्घात गरेको आरोप आफ्नो नाममा जोडिएकोप्रति उनले आपत्ति जनाएका छन्। २०४८ सालदेखि अहिलेसम्म कुनै पनि निर्वाचनमा पार्टीविरुद्ध काम नगरेको दाबी गर्दै उनले प्रमाणित भए आफू पार्टी कार्यालयमै आत्महत्या गर्न तयार रहेको कठोर अभिव्यक्ति दिएका छन्।

साथै, उनले स्थानीय स्तरमा टिकट वितरण प्रक्रियाप्रति पनि असन्तुष्टि जनाउँदै पार्टीले व्यापारी र बाह्य व्यक्तिलाई प्राथमिकता दिएको आरोप लगाएका छन्।

अन्त्यमा, पार्टीभित्र आफूले अपमानित महसुस गरेको र व्यक्तिगत अवस्था, स्वास्थ्य तथा विवेकका आधारमा सर्वोच्च अदालतको फैसला पछि नेपाली कांग्रेसमा नरहने घोषणा गरेको उनले बताएका छन्।

उनले नेपाली कांग्रेसलाई एकताबद्ध बनाउन नेतृत्वले जिम्मेवारी लिनुपर्ने आवश्यकता औँल्याउँदै आफ्नो धारणा सार्वजनिक गरेका हुन्। काँग्रेसको तर्फबाट समानुपातिक सांसदमा मान बहादुर नेपालीको नाम सिफारिस भएको थियो तर निर्वाचन आयोगको अन्तिम नामवलीमा भने नाम देखिएको छैन ।