आठबिसकोट नगरपालिका ४ चौताआ गोतामकोट स्थितको श्री ज्ञानोदय माध्यमिक विद्यालयले मंगलबार विद्यालय नै विदा दिएर राजनीतिक पार्टीको कार्यक्रम सञ्चालन गरेको छ ।
चुनावी प्रसारप्रचारको लागि प्रगतिशील लोकतान्त्रिक पार्टीले आयोजना गर्न लागेको कार्यक्रमको लागि विद्यालय विदा गरिएको हो । सरकारी संस्थामा यसरी विद्यार्थीहरुको भविस्यमाथी खेलवाड गरि आयोजना गरिएको कार्यक्रम निर्वाचन आचारसंहिता विपरीत रहेकोमा सम्बन्धित निकायको ध्यान पुग्न सकेको छैन ।
सार्वजनिक विदा नभएको दिन विद्यालय विदा भएको र तामझामका साथ राजनितिक पार्टीको कार्यक्रम गर्नको लागि व्यानर सहितको तयारी देखेपछि उज्यालोपाटीको तर्फबाट गण्डकी प्रदेश प्रमुख सुजन बिश्वकर्माले विद्यालयसँग सम्बन्धित निकाय विद्यालय प्रशासन र विद्यालय व्यवस्थापन समितिमा सम्पर्क गर्दा विद्यालयका प्रधानाध्यापक ललित विष्टले झुट बोलेर यथार्थ लुकाएका छन ।
फोन सम्पर्कमा संवाद गर्दै प्र.अ ले गलत जानकारी दिइ आफ्नो अपराध लुकाएका थिए उनले एसियायी विकास बैंक द्वारा पन्ध्र कोठाको भवन निर्माण कार्य भइरहेको र आज ढलान गर्नुपर्ने भएकोले स्थानीय विदा अन्तर्गतको विदा गरिएको बताएका थिए तर विद्यालयको प्राङ्गणमा भने विहानै देखि प्र.लो.पाको व्यानर सहितको तयारी गरिएको थियो ।
विद्यालय व्यवस्थापन समितिका अध्यक्ष धर्मराज परियारका अनुसार समितिको निर्णय विपरीत प्र.अ.ले आफुखुशी कार्यक्रम गर्नको लागि विद्यालय विदा गराएको भनेका छन भने उनले विज्ञप्ति नै जारी गरेर प्र.लो.पा. र प्र.अ. लाई कारबाही गर्नको लागि माग गरेका छन ।
आज भन्दा अगाडि देखि नै वि.व्य.स.को मौखिक निर्णय अनुसार विद्यालयमा कुनै पनि राजनीतिक पार्टीका कार्यक्रम आयोजना नगर्ने भनिए पनि पटकपटक प्र.अ.ले आफू खिशी विभिन्न राजनीतिक दलका कार्यक्रमहरु गर्दै आएको वि.व्य.स.का अध्यक्षले बताएका छन ।
नियमित पठनपाठन हुनुपर्ने समयमा विद्यालय नै विदा गरेर राजनितिक दलको कार्यक्रम आयोजना भएको बारे शिक्षा अधिकृत र जिल्ला प्रशासनलाई कुनै जानकारी नभएको सम्बन्धित कार्यालयका प्रतिनिधिहरुले बताएका छन ।
