निर्वाचनको माहोल बढिरहेको बेला उम्मेदवार र मतदाताहरुलाई नजिक बनाउने उदेश्यले समृद्ध राष्ट्र दुरदर्शी नेतृत्व भन्ने नाराका साथ जेसीआई पोखराको आयोजनामा कास्की क्षेत्र नं. २ का प्रतिनिधि सभा उम्मेद्वारहरु बिच प्रत्यक्ष संवाद (ककस) कार्यक्रम सम्पन्न भएको छ ।
बिहिवार पोखरा सभागृह हलमा आयोजित कार्यक्रममा प्रतिनिधि सभा सदस्य प्रत्यक्ष तर्फ कास्की क्षेत्र नम्बर २ बाट उम्मेदवारी दिएका कुल १७ जना उम्मेदवार मध्य ११ जनाको उपस्थिति तय गरिएको भए पनि नेपाली काङ्ग्रेसका उम्मेदवार माधवप्रसाद बास्तोला र राष्ट्रिय स्वतन्त्र पार्टीका उत्तम प्रसाद पौडेल सहभागी भएनन् ।
आयोजकले पटकपटक फोन सम्पर्क गर्दा केहि समयमा आउने बताए पनि दुबैजना उम्मेदवार कार्यक्रम सकिँदासम्म पनि प्रत्यक्ष संवादमा सहभागी भएनन् भने उपस्थित मतदाताहरुले प्रश्न बाट भागेको र जवाफदेही नभएको आवाज उठाएका थिए । साथै कार्यक्रम ए.बि.सि टेलिभिजन मार्फत प्रत्यक्ष प्रसारण भैरहेको हुँदा सहभागी नभएका उम्मेदवारले पनि सुनोस भन्दै प्रश्नहरुको निरन्तरता उनिहरु माथी पनि गरिएका थिए ।
बाकी अन्य उम्मेदवारहरु नेकपा एमालेका रश्मि आचार्य, नेपाली कम्युनिष्ट पार्टीका हेमराज थापा पराजुली, राष्ट्रिय प्रजातन्त्र पार्टीका हेमजंग गुरुङ, उज्यालो पार्टी नेपालका कुशल गुरुङ, मंगोल नेशनल अर्गनाइजेशनका ओलबहादुर गुरुङ, नेशनल रिपब्लिक नेपालका ज्ञानराज गुरुङ साथै स्वतन्त्र उम्मेदवारी दिएका निरञ्जन कोइराला र विष्णु प्रसाद तिमिल्सिना समेतको सहभागीता रहेको थियो ।
बिहान ११ बजेदेखि सुरु भएको कार्यक्रममा संवादको सहजीकरण पत्रकार दीपेन्द्र श्रेष्ठले गरेका थिए भने सहभागी उम्मेदवारहरुले आफ्ना योजना प्रतिबद्धता र आफ्नो उम्मेदवारी किन भन्ने प्रसंगलाई व्याख्या गर्दै आफुहरुलाई मतदान गर्ने बारे स्पष्ट अपिल व्यक्त गरेका थिए ।
