मदरल्याण्ड चेस क्लब पोखराको आयोजनामा गण्डकी प्रदेशका सबै विद्यालयमा अध्ययनरत विद्यार्थीहरुका लागि रणनीति र बुद्धिमत्ताको प्रतिभालाई एकै ठाउँमा ल्याउने लक्ष्यका साथ दुई दिने विद्यार्थी चेस फेस्ट प्रतियोगिता हुने भएको छ ।
कार्यक्रममा विद्यार्थी टिम चेस च्याम्पियनसिप FIDE नियमअनुसार स्विस प्रणालीमा ५–६ राउन्डमा सञ्चालन गरिने छ साथै प्रत्येक खेल १० मिनेट + १० सेकेन्ड इन्क्रिमेन्टमा खेलाइने छ भने प्रारम्भिक चरणपछि उत्कृष्ट १६ टिम नकआउट चरणमा प्रवेश गर्नेछन्। टिम संरचनामा ३ मुख्य खेलाडी, १ रिजर्भ र १ टिम म्यानेजर अनिवार्य रहने व्यवस्था गरिएको छ।
प्रतियोगितामा प्रथम, द्वितीय र तृतीय स्थान प्राप्त गर्ने टिमलाई क्रमशः रु. ५,०००, रु. ३,००० र रु. २,००० सहित ट्रफी, मेडल र प्रमाणपत्र प्रदान गरिने भएको छ भने उत्कृष्ट बोर्ड खेलाडी र Rising Player लाई विशेष सम्मान समेत गरिने उल्लेख गरिएको छ ।
डिजिटल माध्यमबाट सञ्चालन हुने चेस क्विजमा इतिहासदेखि एन्डगेमसम्मका विविध चरण समावेश गरिने साथै समय उपलब्ध भएमा क्रेजीहाउस चेस जोडी शैलीमा सञ्चालन गरिने छ एक कार्यक्रमका लागि रु. ५०० र दुई कार्यक्रमका लागि रु. ८०० दर्ता शुल्क निर्धारण गरिएको छ।
प्रतियोगिताले गण्डकी प्रदेशका विद्यार्थीस्तरमा चेसलाई नयाँ ऊर्जा र प्रतिस्पर्धात्मक उचाइ दिने आयोजकको उदेश्य रहेको छ ।
