राष्ट्रिय स्वतन्त्र पार्टी (रास्वपा)बाट चितवन– ३ मा प्रतिनिधिसभा सदस्यको उम्मेदवार रहेकी निवर्तमान सांसद सोविता गौतमले मेयर र सांसदबीचको फरक जनतालाई बुझाउन आवश्यक रहेको बताएकी छन् । मतदाताले सोधेको जिज्ञासाको जवाफ दिन सामाजिक सञ्जालमा तयार गरेको भिडियोमा सोविताले उक्त कुरा आवश्यक रहेको जनाएकी हुन् ।
‘घरदैलो गर्दैगर्दा एक जना दिदीले ‘मेयर हो ?’ भनेर सोध्नुभयो’ गौतमले भनिन्, ‘मेयर र सांसदबीचको फरक अहिले हामीले नेपाली जनतालाई बुझाउन आवश्यक छ ।’
मेयरको भूमिका स्थानीय समस्या समाधान गर्नेगरी कार्यकारी हुने, र सांसदको भूमिका कानुन निर्माणमा हुने स्पष्ट पार्दै उनले भनिन्, ‘सांसदले बनाएको कानुनमा टेकेर मेयरहरूले काम गर्ने हो । भनेपछि हामीले जस्तो बनाएको कानुनको बेस छ, त्यही कानुनको बेसमा रहेर कार्यान्वयन हुने हो । जुन चाहिँ हामीहरूले बुझाउन आवश्यक छ ।’
गौतमले मतदातालाई जोडेर फरक शैलीमा प्रस्तुत भए पनि यो उनले चितवन– ३ अर्की उम्मेदवार रेनु दाहाललक्षित देखिन्छ । नेपाली कम्युनिस्ट पार्टी (नेकपा)बाट उम्मेदवार बनेकी दाहालले केही दिनअघि गौतमको नाम नै लिएर अभिव्यक्ति दिएकी थिइन् ।
