रुकुम पश्चिम । पूर्व माओवादी केन्द्रका नेता जनार्दन शर्मा एमालेको शरणमा पुगेको भन्ने विषयले राजनीतिक वृत्तमा चर्को चर्चा सुरु भएको छ। पछिल्लो समय माओवादी केन्द्रभित्र बढ्दो असन्तुष्टि, पार्टी विभाजन पछि को असर र आगामी निर्वाचनको तयारीसँगै जनार्दनको राजनीतिक बाटो फेरिन लागेको हो।
जनार्दन शर्मा र नेकपा एमालेका शीर्ष नेताबीच पछिल्ला दिनहरूमा पटक–पटक गोप्य भेटघाट भएको बताइन्छ। यद्यपि यसबारे दुबै पक्षले औपचारिक पुष्टि भने गरेका छैनन्। केहिदिन पहिले एमाले अध्यक्ष केपि ओली र जनार्दन बिच गुण्डुमा भएको भेटघाटमा जनार्दन एमालेमा प्रवेश गर्ने समेत हल्ला चल्यो । तर त्यो भेट चुनावी तालमेलका लागि मात्रै भएको दाबी गरिएको थियो ।
माओवादी केन्द्रभित्र असन्तुष्टि बढ्दै गएको र आफ्नो राजनीतिक भविष्य सुरक्षित गर्न जनार्दनले नयाँ विकल्प खोजेर प्रगतिशील लोकतान्त्रिक पार्टी खोले तर पार्टीको संरक्षक बनेका बाबुराम भट्टराई नै चुनाव बाट पछि हटेपछी जनार्दनले एमालेको साथ खोजेका छन् । रुकुम पस्चिमबाट उम्मेदवार बनेका जनार्दनले एमालेका जिल्ला अध्यक्ष नन्दराम देवकोटा लाई चुनावी कमान्डर तोकेर चुनावमा होमिएका छन् । एमाले सँगको गठबन्धनले जनार्दन नै एमाले प्रवेश गर्ने हल्ला चलेको छ ।
रुकुममा आफुलाई शक्तिशाली नेता र जनमत बलियो भएको दाबी गर्ने शर्मा चुनावबाट डराएर एमालेको शरणमा पुगेको बताईन्छ। स्थानीय राजनीतिक विश्लेषकहरू भने यो विषयलाई “निर्वाचन रणनीतिअन्तर्गतको मनोवैज्ञानिक खेल” पनि हुनसक्ने बताउँछन्। तर यदि जनार्दन साँच्चिकै एमालेतर्फ लागे भने रुकुम पश्चिमको राजनीतिक समीकरणमा ठूलो फेरबदल आउने निश्चित देखिन्छ।
यस विषयमा जनार्दन शर्माको आधिकारिक प्रतिक्रिया आउन बाँकी रहेको छ।
