रुकुम पश्चिम। आसन्न निर्वाचनका लागि उम्मेदवारको टिकट लिन नेपाली काँग्रेस पार्टी केन्द्रीय कार्यालय पुगेका रुकुम पश्चिमका प्रेम प्रकाश ओली टिकट नपाएपछि खाली हात फर्किएका छन्। लामो समयदेखि पार्टी राजनीतिमा सक्रिय रहँदै आएका ओलीले यसपटक उम्मेदवार बन्ने आकांक्षा राखेका थिए।
पार्टी स्रोतका अनुसार ओलीले स्थानीय तथा केन्द्रीय तहका नेताहरूसँग भेटघाट गरी आफ्नो दाबी प्रस्तुत गरेका थिए। तर अन्तिम निर्णयमा पार्टीले अन्य उम्मेदवारलाई प्राथमिकता दिएपछि उनी टिकटबाट वञ्चित भएका हुन्। जिल्ला पार्टीले ओली र गोपाल जिजंग शाहलाई उम्मेदवार सिफारिस गरेको थियो। कांग्रेसको विशेष महाधिवेसन बाट सभापतिमा गगन थापा निर्वाचित भएपछी उम्मेदवार छनौटमा हेरफेर गरिएको हो।
टिकट नपाएपछि प्रतिक्रिया दिँदै ओलीले पार्टीको निर्णयलाई सम्मान गर्ने बताएका छन्। “पार्टीको निर्णय सबैका लागि मान्य हुन्छ, म संगठनलाई अझ बलियो बनाउने काममा लागिरहन्छु,” उनले भने। यस घटनापछि स्थानीय राजनीतिक वृत्तमा विभिन्न चर्चा सुरु भएको छ। ओली समर्थकहरूले भने पार्टी नेतृत्वको निर्णयप्रति असन्तुष्टि जनाउँदै आगामी रणनीति सार्वजनिक गर्ने संकेत गरेका छन्। ओली नेपाली काँग्रेस पार्टीको जिल्ला सभापति समेत हुन्।
नेपाली कांग्रेसको तर्फबाट रुकुम पश्चिममा प्रत्यक्ष तर्फ राजु केसी र समानुपातिकमा मान बहादुर नेपालीलाई पार्टीले उम्मेदवार बनाएको छ।
