काठमाडौँ । नेपाली कांग्रेसका विभिन्न जिल्लाका सभापतिहरूले पार्टीको आधिकारिक निर्णय बिनै आह्वान गरिएको विशेष महाधिवेशनप्रति गम्भीर आपत्ति जनाएका छन्। उनीहरूले संयुक्त विज्ञप्ति जारी गर्दै पार्टी विधान, लोकतान्त्रिक मूल्य र संस्थागत प्रक्रियाविपरीत गतिविधिले पार्टी एकतालाई कमजोर बनाउने चेतावनी दिएका छन्।
विज्ञप्तिमा नेपाली कांग्रेस मुलुकको लोकतान्त्रिक आन्दोलनको गौरवशाली इतिहास बोकेको पार्टी भएको उल्लेख गर्दै पार्टीको जिम्मेवारीपूर्ण भूमिकाले मात्रै आगामी निर्वाचनमा सकारात्मक प्रभाव पार्ने भनिएको छ। कांग्रेसले आफ्नो १५औँ महाधिवेशन सम्पन्न गरी लोकतन्त्रको मेरुदण्डका रूपमा रहेको आम निर्वाचनलाई सफल बनाउनु आजको प्रमुख दायित्व भएको उनीहरूको भनाइ छ।
संयुक्त विज्ञप्तिमा केन्द्रीय कार्यसमितिबाट सार्वजनिक गरिएको १५औँ महाधिवेशनको कार्यतालिकाअनुसार अघि बढ्नुपर्नेमा जोड दिँदै हाल केही व्यक्तिहरूले आह्वान गरेको विशेष महाधिवेशन विधानसम्मत नभएको दाबी गरिएको छ। पार्टी विधिले नचल्ने, व्यक्ति विशेषको इच्छाअनुसार पार्टी सञ्चालन हुन नसक्ने स्पष्ट उल्लेख गरिएको छ।
केन्द्रीय कार्यसम्पादन समितिको २०८२ पौष १८ गतेको निर्णयअनुसार विशेष महाधिवेशनको औचित्य समाप्त भइसकेको जनाउँदै पार्टीको आधिकारिक निर्णयबिनै बोलाइएको कुनै पनि भेला वा महाधिवेशनमा सहभागी नहुन कांग्रेसका सम्पूर्ण तहका नेता–कार्यकर्तालाई आग्रह गरिएको छ।
संयुक्त विज्ञप्तिमा पार्टीका सम्पूर्ण पदाधिकारी, महाधिवेशन प्रतिनिधि, महासमिति सदस्य, भ्रातृ तथा शुभेच्छुक संस्था र विदेशस्थित जनसम्पर्क समितिहरूलाई पार्टी एकता जोगाउन सजग रहन हार्दिक अपिल गरिएको छ। विज्ञप्तिमा सुर्खेत, दैलेख, जाजरकोट, जुम्ला, मुगु, हुम्ला, रुकुम पश्चिम, डोल्पा,कालिकोट र सल्यान लगायत जिल्लाका सभापति तथा उपसभापतिहरूको हस्ताक्षर रहेको छ।
