रुकुम पश्चिम। यहाँको आठविसकोट नगरपालिका–११, गत्तसैनास्थित नेरामावि प्राङ्गणमा “ने.रा.मा.वि. मा जग्गा खरिद र कृषि प्राविधिक सहितको कक्षा ११ र १२ सञ्चालनका लागि” सहयोगार्थ चौर गत्तसैना आठविसकोट श्रङ्गारिक महा–आरती धर्म जागरण सप्ताह तथा महा–महोत्सव–२०८२ आयोजना हुने भएको छ।
आयोजक समितिका अनुसार कार्यक्रम २०८२ पौष १८ देखि २४ गतेसम्म सञ्चालन हुनेछ। महा–महोत्सवमा भारतको काशी विश्वनाथ तथा नेपालको राष्ट्रिय देव पशुपतिनाथमा हुने विश्वप्रसिद्ध श्राद्धिक महा–आरतीको दर्शन, सुसंस्कृत समाज निर्माणका लागि प्रवचन, राष्ट्रिय कलाकारद्वारा भजन–कीर्तन, झाँकी प्रदर्शन, बाल संस्कार लगायतका धार्मिक तथा सांस्कृतिक कार्यक्रमहरू समावेश रहनेछन्।
कार्यक्रमको उद्घाटन पौष १८ गते बिहान ९ बजे कलश यात्रा सहित सुरु भई दिउँसो १ बजे उद्घाटन समारोह आयोजना गरिने छ। सम्पूर्ण कार्यक्रम आठविसकोट–११,गत्तसेना स्थित ने.रा.मा.वि. प्राङ्गणमा हुने जनाइएको छ।
विद्यालयको शैक्षिक पूर्वाधार विस्तार, जग्गा खरिद तथा कृषि प्राविधिक शिक्षा सहित कक्षा ११ र १२ सञ्चालन गर्ने उद्देश्यले आयोजना गरिएको सुवास विकले जानकरी दिए। उक्त महा–महोत्सवमा तन, मन, धन तथा श्रद्धा सहित उपस्थित भई सहयोग गर्न आयोजकले सबै धर्मावलम्बी, अभिभावक, समाजसेवी तथा शुभेच्छुकहरूलाई हार्दिक अनुरोध गरेका छन्।
महा–महोत्सवको अध्यक्षता विव्यस समिति अध्यक्ष चन्द्र बहादुर बिक तथा मूल समारोह समिति अध्यक्ष राम बहादुर चन्दले गर्ने जनाइएको छ।
