सम्पूर्ण पाठकवर्गलाई उज्यालोपाटी परिवारको तर्फबाट हार्दिक अभिवादन !
आज हामीले उज्यालो रिसर्च एण्ड मल्टिमिडिया प्राली द्वारा सञ्चालित उज्यालोपाटी डटकमको पहिलो वर्ष पूरा गरेका छौँ। यो सुखद अवसरमा हामी तपाईहरु प्रति आभारी छौँ । छोटो तर महत्त्वपूर्ण र गौरवमय यात्रामा हामीले अनेक चुनौती र अवसर अनुभव गर्यौँ। पाठकवर्गको विश्वास, सहयोगीहरूको योगदान र सम्पूर्ण टिमको निरन्तर प्रयासका कारण आज दोस्रो वर्षमा लागेका छौँ । हाम्रो एक वर्षे पाईला कठिनाई सँगै अवसरका बिच बित्यो ।
यहाँहरुको अथाह प्रेम, विश्वास र सहकार्यका लागी हामी सधैँ कृतज्ञ छौँ। गत वर्ष २०८१ असोज ८ गते देखि हामी सार्वजनिक भएका थियौँ । हालसम्म यात्रा चुनौतीपूर्ण रह्यो।
भारी वर्षा, बाढी–पहिरो, सहकारी घोटाला, शिक्षा ऐनविरुद्ध शिक्षक आन्दोलन, राजतन्त्र पक्षधरहरूको हिंसात्मक प्रदर्शन हुँदै हालैको जेनजी आन्दोलन सम्म देश निरन्तर घटनाबहुल रह्यो। यी सबै घटनाले हजारौँ जनताको जीवन प्रभावित पारे, राज्यका संरचनामा प्रश्न उठाए र सामाजिक असन्तोषलाई सडकसम्म ल्याए। यी कठिन घडीमा जनतालाई सत्य सूचना र विश्वसनीय खबर उपलब्ध गराउनु सञ्चारमाध्यमहरूको पहिलो कर्तव्य हो भन्ने विश्वासमा हामी दृढ रह्यौँ।
उज्यालोपाटीले बाढी–पहिरोमा पीडितको आवाजलाई प्रमुखता दियो, सहकारी घोटालामा सर्वसाधारणको पीडा उजागर गर्यो, शिक्षा क्षेत्रका मागलाई तथ्यका आधारमा प्रस्तुत गर्यो र आन्दोलनमा उठेका प्रश्नलाई निष्पक्षतापूर्वक जनतासम्म पुर्यायौँ। हामीले न त विपदको त्रासलाई लुकायौँ, न त आन्दोलनको आवाज दबायौँ । दुवैलाई यथार्थका साथ तपाईँहरूसम्म पुर्याउने प्रयास गर्यौँ।
हाम्रो प्रतिबद्धता स्पष्ट छ । जनताको पक्षमा, तथ्यमा आधारित पत्रकारिता । कुनै पनि विपद वा आन्दोलनले हाम्रो कलम र आवाजलाई रोक्दैन। बरु, यस्ता चुनौतीपूर्ण घडीमा नै सञ्चारमाध्यमको आवश्यकता अझ बढी हुन्छ भन्ने प्रमाणित गर्न हामी निरन्तर लागिरहेका छौँ।
गत एक वर्षमा हामीले पत्रकारिताको मूल मूल्यहरू सत्य, तथ्य र निष्पक्षतालाई आधार बनाएर समाचार तथा विचार प्रस्तुत गर्ने प्रयास गर्यौँ। सजिलो बाटो होइन, तर आवश्यक बाटो यही हो भन्ने हाम्रो आस्था अटल छ। हामीले डिजिटल पत्रकारिताको नयाँ अभ्यासलाई आत्मसात गर्दै, सूचना प्रवाहलाई छरितो, पहुँचयोग्य र जिम्मेवार बनाउन खोजेका छौँ। प्रतिस्पर्धी र चुनौतीका रुपमा रहेको नेपाली अनलाईन पत्रकारिता लाई हामीले ब्रेकमा हतार होईन्। तथ्यमा निडर भएर अगाडी बढ्ने प्रण गर्यौँ ।
हाम्रो यात्रा यत्तिमै सीमित छैन्। समाजलाई सही सूचना, विचार र दिशा दिन सक्षम बन्न अझै धेरै गर्न बाँकी छ। हामीले नीतिगत मुद्दा, जनताको सरोकार, लोकतान्त्रिक मूल्य र समाजको सुशासनमा योगदान पुर्याउने पत्रकारिता गर्नुपर्ने जिम्मेवारीलाई गम्भीरताका साथ लिएका छौँ । आगामी दिनमा उज्यालोपाटीले अझै सशक्त सम्पादकीय दृष्टिकोण प्रस्तुत गर्ने, विविध आवाजलाई ठाउँ दिने, र नयाँ पुस्ताका पाठकहरूसँग अझ नजिक हुने लक्ष्य राखेको छ। प्रीय पाठकवर्ग, तपाईँहरूको विश्वास हाम्रो सबभन्दा ठूलो सम्पत्ति हो। यही विश्वासलाई आधार बनाएर हामी निरन्तर अघि बढ्नेछौँ।
हार्दिक धन्यवाद !
सम्पादक
