रुकुम पश्चिम । देशकै दुर्गम र उच्च हिमाली क्षेत्र मानिने डोल्पा जिल्लाको माथिल्लो बस्तीमा अब स्थानीयले नागरिकता, राहदानी, सिफारिस जस्ता प्रशासनिक सेवा पाउन जिल्ला सदरमुकाम सम्मको लामो यात्रा गर्नुपर्ने छैन। नेपाल सरकार गृह मन्त्रालयले डोल्पो बुद्ध गाउँपालिका–१ स्थित धो उपत्यकामा इलाका प्रशासन कार्यालय स्थापना गर्ने निर्णय गरेको छ। गृह मन्त्रालयले माथिल्लो डोल्पाका दुर्गम क्षेत्रहरूमा सेवा सुविधा पुर्याउन इलाका प्रशासन कार्यालय स्थापनाको तयारी थालेपछी त्यस क्षेत्रका स्थानीयमा खुसीयाली छाएको छ ।
प्रधानमन्त्री तथा मन्त्रिपरिषद् बैठकले गृह मन्त्रालयको संगठन र व्यवस्थापन सुधारका लागि २३ नयाँ इलाका प्रशासन कार्यालय थप्ने प्रस्ताव प्रशासन समितिमा पठाएको छ ।
गृह मन्त्रालयका अनुसार, यो कदम सेवाग्राहीलाई जिल्ला प्रशासन कार्यालयसम्म लामो दूरी तय गर्न नपरोस् भनी सेवा प्रवाह सरल र सहज बनाउन उठाइएको हो । दुर्गम भौगोलिक बनावट, सीमित यातायात सुविधा र लामो दुरीका कारण माथिल्लो डोल्पाका बासिन्दालाई साना प्रशासनिक कामका लागि हप्ता–हप्तासम्म सदरमुकाम दुनै पुग्नुपर्ने बाध्यता थियो। अब इलाका प्रशासन कार्यालय गाउँमै रहने भएपछि सेवाग्राहीलाई राहत पुग्ने विश्वास गरिएको छ ।
डोल्पो बुद्ध गाउँपालिकाका अध्यक्ष कार्मा छोइवेल गुरुङ भन्छन, प्रशासनिक कामको लागि तीन दिन हिडेर सदरमुकाम दुनै जानुपर्ने बाध्यता छ । अब गाउँमै प्रशासन हुनु “संघीयता कार्यान्वयनको यो साँचो अभ्यास हो,” अध्यक्ष गुरुङले भने, “अब माथिल्लो डोल्पाली जनताले आफ्नै गाउँमा बसेर प्रशासनिक सेवा लिन सक्नेछन्।” सडक सञ्जाल सङ नजोडिएको माथिल्लो डोल्पा भौगोलिक विकटताकै कारण विकास हुन सकेको छैन्।
स्थानीयवासीहरू इलाका प्रशासन कार्यालय स्थापना हुने निर्णयले सास्ती कम हुने, समय , खर्च बचत हुने र सरकारप्रतिको विश्वास बढ्ने अपेक्षा गर्दै स्वागत गरेका छन्। जिल्लाको सदरमुकाम दुनैबाट तीन दिन पैदलयात्रापछि पुगिने यो उच्च उपत्यका मुलुककै सबभन्दा अग्लो स्थानमा रहेको मानव बस्ती हो । जसको उचाई चार हजार मिटरभन्दा माथि रहेको छ । लामो समयदेखि यहाँका स्थानीय इलाका प्रशासन माग गर्दै आएका थिए । गृह मन्त्रालयले प्रशासन राख्ने निर्णय गरेसँगै यहाँका स्थानीय बासिन्दाले बेहोर्दै आएको सास्ती अन्त्य हुने बिश्वास लिइएको छ ।
