रुकुम पश्चिमको आठबिसकोट नगरपालिका– ७ मा नवनिर्मित वडा कार्यालयको प्रशासनिक भवनको आज एक कार्यक्रमबीच उद्घाटन गरिएको छ। आठबिसकोट नगरपालिकाका नगरप्रमुख रवि केसीले रिबन काटेर भवन उद्घाटन गरेका हुन्।
एक करोड २५ लाख लागतमा वडा कार्यालयको भवन निर्माण गरेको हो । बाँकी घेराबार, अन्य संरचनाका लागि रु ५० लाख लगानी गरिएको उनले बताए । उनका अनुसार घेराबार र अन्य बाँकी संरचना निर्माण हुन बाँकी छन् ।
साढे दुई तलाको १५ कोठे भवनको निर्माण सम्पन्न भएपछी आज उद्घाटन गरिएको हो । उद्घाटन कार्यक्रममा नगरप्रमुख, उपप्रमुख, वडाध्यक्ष, जनप्रतिनिधि, स्थानीय नागरिक तथा विभिन्न सरकारी निकायका प्रतिनिधिहरूको उपस्थिति रहेको थियो।
आठबिसकोटका प्रमुख प्रशासकीय अधिकृत राजेश गौतमले प्रशासनको हिसाबले हेर्दा कार्यालयको भौतिक पूर्वाधार बलियो हुनु भनेको सेवाको गुणस्तर बढाउनु हो। जनताको अपेक्षा अनुसारका सेवा प्रवाह गर्न यस किसिमका पूर्वाधारले महत्वपूर्ण भूमिका खेल्ने बताए ।
२०८० माघ २ गते सम्झौता भएको सो भवन ०८२ असार १५ गते निर्माण सम्पन्न भएको हो । उक्त भवन न्यु विके बिल्डर्स एण्ड सप्लायर्सले निर्माण गरेको हो । भवन निर्माण पछि स्थानीय सेवा प्रवाह थप सहज र प्रभावकारी हुने वडाध्यक्ष अमृत बुढाले जानकारी दिएका छन्। अब वडाका सम्पुर्ण कामकाज नयाँ प्राशासनिक भवन बाट हुने वडा कार्यालयले जनाएको छ । वडा अध्यक्ष बुढाले भने, आजको यो विशेष अवसरमा हाम्रो वडावासीका तर्फबाट म सबैलाई हार्दिक स्वागत र धन्यवाद ज्ञापन गर्न चाहन्छु।
वडावासीको लामो प्रतिक्षा र हाम्रो साझा प्रयासबाट यो वडा कार्यालय निर्माण सम्पन्न भएको छ। अबदेखि नागरिकहरूले जन्मदर्ता, नागरिकता सिफारिस, विभिन्न सेवा प्रमाणपत्रजस्ता कार्यहरू यहींबाट सहजै लिन सक्नेछन्।
हाम्रो लक्ष्य भनेको सेवा प्रवाहमा पारदर्शिता, तत्परता र जनमैत्रीता कायम गर्नु हो। यस कार्यालयबाट हामी अझ नजिकबाट जनताको सेवामा समर्पित रहनेछौं।यस कार्यमा प्रत्यक्ष–परोक्ष सहयोग गर्ने नगरप्रमुखज्यू, सम्पूर्ण नगरकार्यपालिका, इञ्जिनियर, निर्माण टोलि र नागरिकहरूप्रति म आभार प्रकट गर्दछु।
कार्यक्रममा नगर उपप्रमुख धन कुमारी शाहीले गुणस्तरिय रुपमा भवन निर्माण सम्पन्न भएको र अब वडा कार्यालय बाटै सेवा प्रवाह हुने हुदा सेवाग्राहीले थप सहजता पाउने बताईन्।
नगरप्रमुख प्रमुख रवि केसीले उद्घाटन कार्यक्रमलाई सम्बोधन गर्दै वडास्तरमै नागरिकले सहज रूपमा सेवा पाउने वातावरण तयार गर्नु नगरपालिकाको प्राथमिकता भएको बताए । प्रमुख केसीले भने, आजको यो ऐतिहासिक अवसरमा नव–निर्मित वडा कार्यालयको उद्घाटन गर्न पाउँदा म अत्यन्तै हर्षित छु। यो भवन केवल इँटा र सिमेन्टको संरचना होइन, यो हाम्रो सेवा, प्रतिबद्धता र पारदर्शिताको प्रतीक हो। अबदेखि यहाँका नागरिकहरूले आफ्ना सेवा सुविधाहरू सजिलै, सहजै र छिटो पाउनेछन्। हामीले जनताको घरदैलोमै सेवा पुर्याउने लक्ष्यसहित यो कार्यालय निर्माण गरेका हौं। यो कदम समृद्ध र उत्तरदायी स्थानीय शासनतर्फको एउटा महत्वपूर्ण पाइला हो।
भवन उद्घाटन कार्यक्रममा बिभिन्न राजनीतिक दलका प्रतिनिधि शिक्षक, कर्मचारी तथा स्थानीयहरुको उपस्थिती रहेको थियो भने कार्यक्रमको सञ्चालन वडा सचिव मधुबाबु खडकाले गरेका थिए ।
