रुकुम पश्चिमका सबै छवटा स्थानीय तह ,तीन नगरपालिका र तीन गाउँपालिकाले—आगामी आर्थिक वर्ष २०८२/८३ का लागि आ–आफ्नो अनुमानित वार्षिक बजेट सम्बन्धित सभामार्फत सार्वजनिक गरेका छन्। चालु तथा पुँजीगत खर्च समेटिएको बजेटमार्फत सबै तहहरूले पूर्वाधार विकास, सेवा प्रवाह, सामाजिक सुरक्षा, र नीति कार्यक्रम कार्यान्वयनमा प्राथमिकता दिएका छन्।
यसै क्रममा सबैभन्दा बढी बजेट चौरजहारी नगरपालिकाले सार्वजनिक गरेको छ भने सबैभन्दा कम बजेट बाफिकोट गाउँपालिकाले पेस गरेको छ। प्रस्तुत विवरणहरूमा चालु खर्चको हिस्सा तुलनात्मक रूपमा बढी देखिएको छ भने पुँजीगत खर्चको हिस्सा केही कम देखिन्छ।
कुन पालिकाले कति बजेट ल्याए ?
मुसिकोट नगरपालिका
रुकुम पश्चिमको मुसिकोट नगरपालिकाले आगामी आर्थिक वर्ष २०८२/०८३ का लागि झन्डै ७० करोड बराबरको बजेट अनुमान गरेको छ । आजको १५ औँ नगर सभामा उपप्रमुख विमलकुमार पुनले आगामी वर्षका लागि ६९ करोड ९९ लाख ९४ हजार २ सय रुपैयाँ बराबरको अनुमानित बजेट प्रस्तुत गर्नुभएको हो ।
जसमा चालु तर्फ ५२ करोड ७० लाख ९४ हजार २ सय अर्थात् ७५.३० प्रतिशत रहेको छ भने पुँजीगत तर्फ १७ करोड २९ लाख अर्थात् २४.७० प्रतिशत मात्र रहेको छ ।
आठबिसकोट नगरपालिका रुकुम पश्चिमको आठबिसकोट नगरपालिकाको आगामी आर्थिक वर्ष २०८२/०८३ को बजेट साढे ७६ करोड रहने भएको छ । १८ औँ नगर सभामा आज नगर उपप्रमुख धनकुमारी शाहीले ७६ कराेड ३८ लाख ६९ हजार बराबरको अनुमानित बजेट प्रस्तुत गर्नुभएको हो ।
नगरको नीति तथा कार्यक्रम कार्यान्वयनका लागि चालु तर्फ ४९ करोड ३४ लाख ३२ हजार अर्थात् ६४.६० र पुँजीगत तर्फ २७ करोड ४ लाख ३७ हजार अर्थात् ३५.४० प्रतिशत गरी कुल बजेट विनियोजन गरिएको हो ।
चौरजहारी नगरपालिका
नगरपालिकाको आगामी आर्थिक वर्ष २०८२/०८३ का लागि झन्डै ८२ करोड रहेको छ । नगर उपप्रमुख ईश्वरी शर्मा बिएमले नगर सभामा पेस गरेको कुल बजेट ८१ करोड ९४ लाख ८३ हजारको बजेट रहेको छ ।
बजेट चालु तर्फ ४२ करोड ८३ लाख १९ हजार ७ सय ८८ अर्थात् ७४.५९ प्रतिशत रहेको छ भने पुँजीगत तर्फ १४ करोड ५८ लाख अर्थात् २५.४० प्रतिशत रहेको छ ।
बाफिकोट गाउपालिका रुकुम पश्चिमको बाँफिकोट गाउँपालिकाले आगामी आर्थिक वर्ष २०८२/८३ को लागि ५० करोड २५ लाख ७४ हजार ५ सय ६३ बजेट १८ औँ गाउँ सभाकाे आजको बैठकमा पेस गरेको छ । गाउँपालिका उपाध्यक्ष तारा बुढा केसीले गाउँ सभामा आगामी आर्थिक वर्षको अनुमानित बजेट पेस गर्नुभएको हो ।
त्रीबेणि गाउपालिका रुकुम पश्चिमको त्रिवेणी गाउँपालिकाले आगामी आर्थिक वर्ष २०८२/८३ को लागि ५४ करोड ८६ लाख ३२ हजार बजेट गाउँ सभामा पेस गरेको छ । आज गाउँपालिका उपाध्यक्ष राजकुमारी रेउलेले गाउँ सभाको १३ औँ अधिवेशनमा नीति तथा कार्यक्रम कार्यान्वयनका लागि बजेट पेस गर्नुभएको हो ।
कुल बजेट मध्य चालू तर्फ ४१ करोड ५४ लाख ३२ रुपैयाँ अर्थात् ७५.७२ प्रतिशत र पुँजीगत तर्फ १३ करोड ३२ लाख अर्थात् २४.२८ प्रतिशत बजेट विनियोजन भएको छ ।
सानिभेरी गाउपालिका रुकुम पश्चिमको सानीभेरी गाउँपालिकाको आगामी आर्थिक वर्षको बजेट झन्डै ५४ करोड रहने भएको छ । १७ औँ गाउँ सभाको आजको बैठकमा उपाध्यक्ष कमला रोकाले गाउँ सभामा पेस भएको नीति तथा कार्यक्रम कार्यान्वयन तथा अनिवार्य दायित्व भुक्तानीका लागि आगामी वर्षको अनुमानित बजेट पेस गर्नुभएको हो । आगामी वर्षका लागि अनुमान गरिएको कुल बजेट मध्ये चालु तर्फ ३९ कराेड ३३ लाख ९२ हजार ४ सय ३२ अर्थात् ७२.८९ प्रतिशत र पुँजीगत तर्फ १४ करोड ६३ लाख १४ हजार ५ सय ६७ रुपैयाँ अर्थात् २७.११ प्रतिशत रहेको छ ।
