रुकुम पश्चिमको आठबिसकोट नगरपालिकाले आगामी आर्थिक वर्ष २०८२÷०८३ का लागि नीति तथा कार्यक्रम ल्याएको छ । मंगलबार नगर सभा बैठकमा नगर प्रमुख रवि केसीले आगामी आर्थिक वर्षका लागि नीति तथा कार्यक्रम प्रस्तुत गरेका हुन ।
“समृद्ध गाउँ शहरको रहर, स्वस्थ, सफा सुशासनयुक्त समन्यायिक र समाजवाद उन्मुख आठबिसकोट नगर” को दीर्घकालीन उदेश्य पुरा गर्न १८ औँ नगर सभा मार्फत आयोजना बैङ्क र युवा स्वरोजगार , स्वास्थ्य शिक्षा र भुकम्प पछिको पुननिर्माणलाई केन्द्रित रहेर नीति तथा कार्यक्रम निर्माण गरिएको नगर प्रमुख केसीले बताए । खस्किरहेको आर्थिक अवस्थालाई पन्छाउँदै दिगो विकास लक्ष्य प्राप्त गर्न नगरपालिका प्रतिबद्ध रहेको केसीले उल्लेख गरे ।
नगरको आर्थिक विकास, सामाजिक विकास, पूर्वाधार विकास, वन वातावरण तथा विपत् व्यवस्थापन, सुशासन तथा संस्थागत विकासलाई प्राथमिकतामा राखेर नीति कार्यक्रम बनाइएको छ ।
नीति तथा कार्यक्रममा भुकम्प पछिको पुननिर्माणलाई मुख्य प्राथमिकता राखिएको छ । त्यस्तै कृषि हाट बजार सङ्कलन केन्द्र सञ्चालन गर्ने, यावसायिक कृषकलाई सामाजिक सुरक्षा कोषमा आबद्ध गर्न पहल गर्ने, नगर प्रमुख , उपप्रमुख सँग युवा स्वरोजगारका कार्यक्रम सञ्चालन गर्ने , विपदको साथि नगर सरकार , बसोबास गाउँमा भविष्य आफ्नै ठाउँमा भन्ने नारा सहित नीति तथा कार्यक्रममा उल्लेख छ ।
