आठबिसकोट । रुकुम पश्चिमको आठबिसकोट नगरपालिका -९ राडीबजार क्षेत्रमा खानेपानीको चरम अभावका बीच, स्थानीय बासिन्दाले आफ्नो पहलमा निजी पाइपमार्फत घरमै धारा जडान गरेका छन्। जब सार्वजनिक खानेपानी योजनाबाट नियमित आपूर्ति हुन सकेन, तब उनीहरुले वैकल्पिक उपाय अपनाएका हुन्।
आठबिसकोट-९ का स्थानीय गगन खत्रीले विगत केही महिनादेखि घरमा पानी नआएको र खानेपानीको नाममा लाखौँ रकम खर्च भएर पनी धारामा पानी नआए पछि आफै स्थानीय समुदाय मिलेर निजि पाईपमा पानी ल्याईएको खत्रीले बताए । उनका अनुसार, नगरपालिका र “वडामा पटक–पटक गुनासो गर्यो, तर कसैले सुनेन। अन्त्यमा आफैंले निजी पाइप जोडेर पानी ल्याउन बाध्य भएँ ।
उनी सहित १५ घरधुरीले झन्डै ४ हजार मिटर टाढाको प्राकृतिक मुहान कालोखोला बाट पाइप तानेर घरमा धारा जडान गरेका हुन्। यो कार्यका लागि उनीहरुलाई झन्डै १५ लाख रुपैयाँ खर्च भएको थियो। वडा नम्वर १२ मा पर्ने कालोखोला बाट राडीबजारका स्थानीयले खानेपानी ल्याएका हुन्। 
स्थानीय अन्य बासिन्दाहरू भने अझै पनि सार्वजनिक धाराको भरमा निर्भर छन्, । जहाँ दैनिक पानी नआउने बाध्यता छ। कतिपय घरधुरीमा महिनौंदेखि धारा सुकेका छन्। तर पालिकाको मुख्य बजार क्षेत्रमा पानीको हाहाकार छ ।
स्थानीय सरकारले भने खानेपानी आपूर्तिको समस्या समाधान गर्न योजना बनाएको दाबी गर्दै आएको छ, । तर कार्यान्वयनमा ढिलाइ भइरहेकाले जनतामा आक्रोश बढ्दो छ।
स्थानिय बासिन्दा शैलेन्द्र शाह भन्छन्, “हामी पनि आफ्नै खर्चमा निजी धारा तान्न बाध्य भएका छौँ । लामो समय देखि घरमा खानेपानीको अभाव झेलिरहेका हामी १५ घर परिवारले आफ्नै खर्चमा ५० एमएमको पाइपमा खानेपानी ल्याएका हौँ।
राज्यले आधारभूत सेवा दिन नसकेको यो तीतो यथार्थ हो । खानेपानीका झण्डै १०० भन्दा बढी आयोजना छन्। तर धारोमा पानी आउँदैन्। पालिकाको प्रशासनिक केन्द्रमा समेत खानेपानीको चरम अभाव देखिएको छ । राडीबजारमा यहाँका बासिन्दाले लामो समय देखि व्यक्तिगत रुपमा खानेपानी ल्याएर प्रयोग गरिरहेका छन्।
