रुकुम पश्चिमको आठबिसकोट नगरपालिकाका वडा नम्वर-११ रिठामा सञ्चालित रिठा बहुउपयोगी खानेपानी तथा सरसफाइ योजनाको आज शुक्रवार अनुगमन गरिएको छ । सबैका लागि दिगो खानेपानी सरसफाइ तथा स्वच्छता आयोजना ( सुस्वा) र नगरपालिकाको संयुक्त टोली द्वारा अनुगमन गरिएको हो । योजनाको कार्यान्वयन अवस्थाबारे प्रत्यक्ष जानकारी लिन गरिएको उक्त अनुगमनमा आठबिसकोटका नगरप्रमुख रवि केसी, उपप्रमुख धन कुमारी शाही , सुस्वा आयोजनाका डिप्युटी टिम लिडर मान बहादुर बि.क., प्रमुख प्रशासकीय अधिकृत , सुस्वा आयोजनाका वास सल्लाहकार प्राविधिक, र उपभोक्ता समिति प्रतिनिधिको सहभागिता रहेको थियो।

अनुगमनका क्रममा योजनाको भौतिक प्रगति, बजेटको उपयोग, निर्माण गुणस्तर, र सेवा प्रवाहका विषयमा निरीक्षण गरिएको हो। सुस्वा आयोजनाका डिप्युटी टिम लिडरले सु्स्वा आयोजना अन्तरगत २५ पालिकाहरुमा यसै आर्थिक वर्षमा सञ्चालनमा रहेका ७ वटा खानेपानी तथा सरसफाइ आयोजनाहरु मध्ये यो योजना पनि एक रहेको जानकारी दिए । साथै यस आयोजनाबाट खानेपानीको समस्या समाधान भई सिँचाई मार्फत आम उपभोक्ताहरुको जीविकोपार्जनमा पनि सहयोग पुग्ने उनले बताए ।

सुस्वा आयोजनाका वास सल्लाहकार प्रमोद लाल श्रेष्ठले योजना समयमै सम्पन्न गरी पूर्ण सरसफाइका सुचकहरुपनि पुरा गर्दै खानेपानी सेवा क्षेत्रलाई पूर्ण सरसफाइ उन्मुख क्षेत्र घोषणा गर्नतर्फ अग्रसर हुनुपर्ने भन्दै शुभकामना व्यक्त गरे ।योजनाहरुमध्ये यो खानेपानी तथा सरसफाइ आयोजना बहुउपयोगी भएकाले प्रतिनिधिहरूले योजना कार्यान्वयनमा पारदर्शिता, गुणस्तरीयता र समयसीमा पालनामा विशेष जोड दिनुपर्ने बताए। यो आयोजनाको काम ९५ प्रतिशत सकिएको बताईएको छ । अनुगमनका क्रममा डिजाईन स्टामेट र गुणस्तरताको सुनिश्चिता भएको अनुगमन टोलीले जनाएको छ ।

कार्यक्रममा बोल्दै नगर प्रमुख रवि केसीले भने, “योजनाहरू जनताको हितमा होस् भन्ने हाम्रो प्राथमिकता हो। अनुगमनमार्फत योजनामा कमजोरी देखिएको खण्डमा तुरुन्त सुधार गर्न निर्देशन दिइएको छ । केसीले भने, नगरपालिका र आयोजना दुवै मिलेर योजनाको दीगोता सुनिश्चित गर्ने प्रतिबद्ध छौँ ।

सुस्वा आयोजनाका प्रतिनिधिले जनसहभागिता र स्थानीय जिम्मेवारी बिना योजना सफल नहुने भन्दै अनुगमनको नतिजा आधारमा सुधारात्मक कदम चालिने बताएका छन्। मिटर जडित धारा भएकाले यो आयोजना समान रुपमा वितरण हुने बताईएको छ । उक्त आयोजना मार्फत घर घरमा बालमैत्री र अपाङगमैत्री धारा बनेको आयोजनाले जनाएको छ । सो आयोजनामा खानेपानीको मुहान संरक्षण र जलवायु परिवर्तनको असर कम गर्न बायोइन्जिनियरिङ मार्फत खानेपानीको मुहान संरक्षित गरिएको छ, । जसले गर्दा खानेपानीको मुहानमा पहिरो रोकथाम सङै वृक्षरोपण गरेर मुहानलाई थप संरक्षित गरिएको छ । साथै यस योजनामा (Inline Chlorination )जडान गरिएकाले उपभोक्ताहरुले सुरक्षित खानेपानीको उपभोग गर्नेछन् ।

भुकम्प प्रभावित क्षेत्रमा दिगो खानेपानी आयोजना बन्ने भएपछी उपभोक्ताहरुमा खुसीयाली छाएको छ । भुकम्पका कारण सुक्दै गएका मुहानहरुलाई संरक्षण गरेर खानेपानीको आयोजना बन्ने भएपछी स्थानीयहरुमा खुसीयाली छाएको हो । सोही ठाउँकी उपभोक्ता सिमा चन्दले भनिन, यस अघि हामीले धेरै खानेपानीको काम गर्यौ! योजनाहरु पनि थिए । तर ती सबै एक वर्षभित्रमा लथालिङ्ग भएर गए । तर यि आयोजना दिगो र भरपर्दो रहेको छ । यो आयोजना सम्पन्न पछि अब हामीले खानेपानीको झनझट बाट मुक्त हुने आशा गरेका छौ।

अनुगमन कार्यक्रममा आठबिसकोट नगरपालिकाका प्रमुख रवि केसी , उपप्रमुख धन कुमारी शाही, निमित्त प्रमुख प्रशासकीय अधिकृत राजेश गौतम, सुस्वा आयोजनाका डिपुटी टिम लिडर मान बहादुर बिक, वास सल्लाहकार प्रमोदलाल श्रेष्ठ , वास संयोजक नरेन्द्र केसी , प्राविधिक सहजकर्ता र सामाजिक परिचालकहरुको उपस्थिति रहेको थियो ।