आठबिसकोट नगर अस्पतालले जागिर छोडेको ६ महिना सम्म पनि कर्मचारीलाई तलब दिएको भेटिएपछि उक्त कर्मचारीले आफु लाई दिइएको तलब बापतको पैसा फिर्ता गरेका छन्। नगर अस्पतालले गत वर्षको जेठमा राजीनामा दिएर जागिर छोडेकी स्वास्थ्य चौथो तहमा कार्यरत सुस्मा केसीलाई जागिर छोडेको ६ महिना पछि सम्म पनि तलब खुवाईएको पाईएको हो ।
उज्यालोपाटीलाई प्राप्त जानकारी अनुसार करार सेवामा कार्यरत केसीले गत जेठमै राजीनामा दिएर अस्पताल बाट बिधाई गरिएको थियो । अस्पतालले एक कार्यक्रमका विच बिधाई गरिएको कर्मचारीलाई निरन्तर तलब दिईएको पाइएपछि अहिले रकम फिर्ता गरिएको छ । स्वास्थ्य शाखाको लापरबाहीका कारण ०८१ असार देखि केसीलाई तलब दिईएको पाईएको हो ।
आठबिसकोटका तत्कालिन निमित्त प्रशासकीय अधिकृत मणि राज शाहले कर्मचारीलाई तलब दिँदा लापरवाही तरिकाले रुजु गरेर यस्तो खालको त्रुटी भएको बताईएको छ ।शाह अधिकृत हुँदा केसीले राजीनामा दिएर गएकी थिइन्। जागिर छोडेर पनि तलब आइरहँदा आफु छक्क परेको केसी बताउँछिन्। उनले भनिन, मलाई चैत महिनामा मात्रै नगरपालिकाले जानकारी गरायो । पहिले नै पैसा फिर्ता गर्छु ।भन्दा खाता नम्वर गलत दिएका थिए । फेरी अहिले नगरपालिकाको अर्को खाता नम्वर मार्फत पैसा जम्मा गरेको छु । मैले जागिर छोडेको १ वर्ष पछि जानकारी दिएपछी मलाई शंका लागेर छलफल गरेर मात्रै पैसा फिर्ता गरेको छु ।
उनको खातामा ६ महिना बराबरको १ लाख ३७ हजार रुपैयाँ गएको थियो । २०८१ असार महिनाको र २०८१ फागुन महिनामा मंसिर महिनाको तलब केसीको खातामा गएको पाईएको हो । बिहिवार उनले सो रकम नगरपालिकालाई फिर्ता गरेकी छन्।
