आठबिसकोट । रुकुम पश्चिमको आठबिसकोट नगरपालिका स्थित राडीबजारमा नगरपालिकाले छड्के अनुगमन का क्रममा जफत गरेको मालसमान आज गाडेर नष्ट गरेको छ । सोमबार राडीबजारमा सञ्चालित पसलहरुबाट अवैध रुपमा विक्रिवितरण भैरहेका मदिरा , म्याद नाघेका खाद्यान्न तथा जङफुड जफत गरिएको थियो ।
बजार क्षेत्रबाट जफत गरिएको करिब २ लाख ५० हजार रुपैयाँ बराबरको मालसमान नष्ट गरिएको प्रमुख प्रशासकीय अधिकृत राजेश गौतमले जानकारी दिए । गौतमका अनुसार म्याद गुज्रीएका १ सय ३७ बोरा चामल , दाल र सुर्तीजन्य पदार्थ तथा जङफुडहरु नष्ट गरिएको हो । म्याद गुज्रीएका सामग्री सहित दर्ता तथा नविकरण नगरिएका पसलहरुबाट नगरपालिकाले २० हजार रुपैयाँ जरिवाना गरेको थियो । आठबिसकोट ९ स्थित ठाटीखोला नजिकै खाल्डो खनेर गाढेर नष्ट गरिएको हो ।अनुगमनका क्रममा जफत भएको मदिरा पनि केही दिन मै नष्ट गर्ने जनाईएको छ ।
बजार अनुगमन समितिका एवम् नगर उपप्रमुख धन कुमारी शाही, प्रमुख प्रशासकीय अधिकृत राजेश गौताम, प्रशासन शाखा अधिकृत नेत्र नारायण भण्डारी, बरिष्ठ शिक्षा अधिकृत इन्द्र बहादुर बिष्ट, लेखा शाखा प्रमुख गणेश थापा, उधोग शाखा प्रमुख त्रीपुरा चन्द, यातायात प्रमुख रत्न परियार, रोजगार संयोजक कमल भट्टराई , नगर प्रहरी प्रमुख निरज बिक र नेपाल प्रहरीको उपस्थितिमा जफत गरिएका सामग्री गाडेर नष्ट गरिएको हो ।
