आठबिसकोट । रुकुम पश्चिमको आठबिसकोट-९ स्थित आठबिसकोट सहकारीबाट ऋण लिएकाहरुलाई ७ दिन भित्र साँवा व्याज र जरिवाना सहित बुझाउन न्यायिक समितिले पत्राचार गरेको छ । गत २३ गते शुक्रवार समितिले सहकारीबाट लिएको ऋण लामो समय सम्म नबुझाएपछि पत्राचार गरेर सात दिनभित्र बुझाउन आग्रह गरेको छ ।

सहकारीबाट करिब १ करोड ७२ लाख बढी रकम लिएर हालसम्म नबुझाउनेहरुलाई सात दिन भित्र नबुझाएमा कानुन बमोजिम कारबाहीका लागि अगाडी बढ्ने पत्रमा उल्लेख गरिएको छ ।

न्यायिक समितिले यस अघि ऋण लिएर नबुझाएकाहरुलाई २०८१ माघ २३ गते पहिलो पटक पत्र पठाएको तिर हाल सम्म केही सर्वसाधारणले आफुले लिएको रकम बुझाएपनि ठुलो रकम लिनेहरुले भने अटेरी गरिरहेको बुझिएको छ ।

सबैभन्दा बढी ऋण लिएका आठबिसकोट ५ का ललित भण्डारी र वडा नम्वर १० का गोविन्द केसीले पाइलट पढ्न५०/५० लाख रुपैयाँ लिएर वर्षौँ सम्म फिर्ता नगरेको बताइएको छ । त्यस्तै कर्णाली वेभरेज (दल बहादुर शाह) अध्यक्ष लाई दिएको २६ लाख ३२ हजार रुपैयाँ पनि फिर्ता हुन सकेको छैन्। सहकारी बाट रकम लिएका ३६ जना मध्ये केहीले ऋण बुझाएपनी ठुलो रकम लिनेहरुले अझैंसम्म बुझाएका छैनन्। न्यायिक समितिले पटक पटक ताकेता गरेपनी अटेरी गर्दै आएको समितिले जनाएको छ ।

न्यायिक समितिका संयोजक धन कुमारी शाही भन्छिन, यो पत्राचार अब अन्तिम पत्र हो । ऋणीहरुलाई बारम्बार ताकेता र पत्राचार गर्दा अटेरी गरिरहेका छन्। अबको सात दिन भित्र रकम फिर्ता नगरे कानुन बमोजिम अगाडी बढ्छ । शाहीका अनुसार यस अघि पनि ऋणीहरुलाई पत्राचार गरिएको थियो । तर उनीहरुले रकम फिर्ता नगरेको बताईन्।

उक्त सहकारीमा आठबिसकोट नगरपालिकाको मात्रै १ करोड ७२ लाख रुपैयाँ डुबेको छ । पालिकाबाट शैक्षिक कर्जाको लागि लिएको एक करोड रुपियाँ, घरेलु तथा साना उद्योगका लागि ३८ लाख ४० हजार र विपन्न नागरिकको शेयर लगानीको लागि लिएको ३३ लाख ६५ हजार रुपियाँ फिर्ता गर्न नसकेको जनाईएको छ ।