रुकुम पश्चिम ।रुकुम पश्चिमको चौरजहारी नगरपालिकामा विश्व वातावरण दिवसको अवसरमा सप्ताहव्यापी सरसफाइ अभियान सञ्चालन गरिएको छ। जेठ १६ गतेदेखि २१ गतेसम्म सञ्चालन भएको उक्त अभियानले वर्षौँदेखि थुप्रिएको फोहोर हटाउँदै नगरलाई सफा र हरियाली बनाउन महत्वपूर्ण पहल गरेको छ।
मानव विकास तथा सामुदायिक सेवा (HDCS) संस्थाको अगुवाइमा सञ्चालन गरिएको अभियानमा स्थानीय व्यापारी, व्यवसायी, जनप्रतिनिधि, विद्यार्थी, सुरक्षाकर्मी र सर्वसाधारणको उल्लेख्य सहभागिता रहेको थियो।
अभियान अन्तर्गत वडा नम्बर १ र २ का मुख्य तथा सहायक बजार क्षेत्रमा सरसफाइ गरिएको थियो। लामो समयदेखि थुप्रिएको फोहोर र दुर्गन्धका कारण स्थानीयवासीले भोग्दै आएको समस्या समाधानमा राहत पुगेको वडाध्यक्ष इन्द्रे गिरीले जानकारी दिनुभयो।
अभियानकै क्रममा सहभागीहरूले नगरलाई सफा र हरियाली बनाउन प्लास्टिकमुक्त क्षेत्र बनाउने, सार्वजनिक स्थलमा फोहोर नगर्ने र घरआँगन सफा राख्ने प्रतिबद्धतासहित हस्ताक्षर अभियानमा पनि सहभागी भएका थिए।
मानव विकास तथा सामुदायिक सेवा संस्थाका संयोजक यदु कुमार के.सी. लाई सम्पर्क गर्दा नगरवासीको सरसफाइप्रतिको चेतना बढ्दै गएको बताउनुभयो। उहाँले भन्नुभयो, “हामीले हरेक टोलमा टोल सरसफाइ समिति गठन गरेका छौं र सबै टोलमा डस्टबिन राखेका छौं।
यसले नगरबासीमा सफाइप्रतिको चेतना एक स्तरले बढेको छ। अब हामी प्लास्टिक प्रदूषण घटाएर चौरजहारीलाई सुन्दर नगर बनाउने छौं।”
संयोजक के.सी. ले थप भन्नुभयो, “यस अभियानमा हामीले स्थानीय असरको दरिलो साथ पाएका छौं। नगरपालिकाले पनि हामीलाई भरपुर सहयोग गरेको छ। अब हामी सरसफाइको क्षेत्रमा चौरजहारीलाई नमुना नगर बनाउने लक्ष्यसहित अगाडि बढिरहेका छौं।”
अभियानले वातावरण संरक्षण र जनस्वास्थ्यमा सकारात्मक सन्देश दिएको आयोजकको भनाइ छ। साथै स्थानीयवासीले यस्तो कार्यक्रमलाई निरन्तरता दिनुपर्ने माग गरेका छन्
