बुधबारमात्रै थुनामुक्त भएका नेपाली कांग्रेस नेता मोहम्मद अफताब आलम अन्नपूर्ण न्युरो अस्पतालको सघन उपचार कक्ष (आईसीयू) मा भर्ना भएका छन्।
आज बिहान ७ बजे उनलाई मस्तिष्कघात भएको र परिवारका सदस्यले १०:३० बजे काठमाडौँको माइतीघरमा रहेको अन्तपूर्ण न्युरो अस्पतालमा पुर्याएको अस्पताल स्रोतले जानकारी दिएकाे छ ।
अस्पताल स्रोतका अनुसार उनको सघन उपचार कक्ष (आईसीयू) मा उपचार भइरहेको छ । उपचारमा रहेका डाक्टरकाअनुसार आलमलाई मस्तिष्कघात भएको साठे ३ घण्टापछि अस्पताल ल्याइएको थियो । स्टाेक हुँदा उनको देब्रे साइडको मस्तिष्कमा असर भएको उपचारमा रहेका डाक्टरले जानकारी दिएका छन् ।
आलमलाई अस्पताल ल्याइ पुर्याउँदा उनकाे बोली पनि नआएको, शरीर पनि चल्न सक्ने अवस्थामा नरहेको र बोल्न खोज्दा बोली लर्बरिएर बुझ्न नसक्ने अवस्था थियो । तर बिहानदेखिको उपचारपछि उनको स्वास्थ्यमा क्रमिक सुधार हुँदै गएको छ ।
तत्काल अपरेशन गर्नु पर्ने नभएपनि किड्नीकाे पुरानै समस्या, सुगर-प्रेसरलगायतका रोगबाट ग्रसित आलमलाई अझ केही दिन आईसीयूमै राखेर उपचार गर्नु पर्ने अवस्था रहेको उपचारमा खटिएका डाक्टरले जानकारी दिएका छन् ।
तत्काललाई खतरामुक्त रहेपनि उनको शारीरिक अवस्थाका बारेमा यसै भन्न नसकिने अस्पताल स्रोतले जनाएको छ ।
उनी बुधबारमात्रै उच्च अदालत जनकपुर, अस्थायी इजलास वीरगञ्जका न्यायाधीशहरु खुशी प्रसाद थारु र अर्जुन महर्जनबाट भएको फैसलाबाट थुनामुक्त भएका थिए ।
रौतहट जिल्ला अदालतको फैसला अनुसार जन्म कैदको सजाय भुक्तान गरिरहेका आलमलाई उच्च अदालतले बुधबार सफाइ दिएको थियो।
२०८१ वैशाख १३ गते रौतहट जिल्ला अदालतका न्यायाधीश मातृकाप्रसाद आचार्यको इजलासले आलमलाई जन्मकैदको सजाय सुनाएको थियो ।
पहिलो संविधानसभा निर्वाचनताका बम बनाउने क्रममा पड्केर घाइते भएका पाँच जनालाई इँटाभट्टामा हालेर आलमले निर्ममतापूर्वक हत्या गरेको आरोपमा अभियोग दर्ता भएको थियो ।
