आठबिसकोट । नेपाल शिक्षक महासङ्घ आठबिसकोट नगरपालिकाले आठबिसकोट नगरपालिका रुकुम पश्चिमलाई ध्यानाकर्षण पत्र बुझाएको छ। आज महासंघले आफ्ना विभिन्न माग राख्दै नगरपालिकालाई ध्यानाकर्षण पत्र बुझाएको हो। २०८१ साल माघ १६ र १७ गते बसेको राष्ट्रिय समितिको बैठकको निर्णय अनुसार पहिलो चरणका आन्दोलनका कार्यक्रमहरु थालनी गरेको नेपाल शिक्षक महासङ्घ आठबिसकोटका अध्यक्ष देवबहादुर केसीले जानकारी दिनुभयो ।
आठबिसकोट नगरपालिकाका निमित्त प्रमुख प्रशासकीय अधिकृत राजेश गौतम र नगर उपप्रमुख धनकुमारी शाहीलाई ध्यानाकर्षण पत्र बुझाइएको केसीले बताउनुभयो ।
२०७५, २०७८ र २०८० सालमा सञ्चालित आन्दोलनको बलमा नेपाल सरकारसँग महत्वपूर्ण सहमतिहरु भएका र अब स्थायी, राहत, साबिक उच्च माध्यमिक विद्यालय, शिक्षण सिकाई अनुदान, अस्थायी/करार, प्राविधिक धार, विशेष शिक्षा, संस्थागत विद्यालयका शिक्षक लगायत सबै खालका शिक्षक र विद्यालय कर्मचारीका सबै मुद्दाहरू सम्बोधन हुने विद्यालय, विद्यार्थी, शिक्षक-कर्मचारी मैत्री अग्रगामी विद्यालय शिक्षा ऐन ल्याउनु आवश्यक रहेको बताइएको छ।
तर विगतमा भएका सबै सहमति सम्बोधन हुनेगरी शिघ्रातीशीघ्र विद्यालय शिक्षा ऐन जारी गर्ने कामबाट राज्य अझै अनेक बाहना गरी भाग्ने प्रयत्नमा रहेको देखिएको आरोप लगाइएको छ।
ध्यानाकर्षण पत्रमा भनिएको छ “विद्यालय शिक्षा ऐन संसदीय प्रक्रियामा रहेकै बेला ऐनले सम्बोधन गर्नुपर्ने विषयमा आम शिक्षकको भावना विपरीत निवृत्तिभरण सम्बन्धी अध्यादेश जारी हुनुले पनि यो कुराको पुष्टि गर्दछ । सरकारकै निर्णयबाट हुनसक्ने बाल कक्षा शिक्षक, विद्यालय कर्मचारी र संस्थागत विद्यालयका शिक्षकको लागि उचित तलबमान, शिक्षकको ग्रेड मिलान, शिक्षकको मर्यादाक्रम, शिक्षक अस्पताल, शिक्षक सरुवा कार्यविधिको खारेजी, मासिक तलब भुक्तानी जस्ता सामान्य काम समेत गरिनुबाट सरकारको शिक्षा शिक्षक कर्मचारी विरोधसोज प्रष्ट हुन्छ।
यसर्थ विगतमा भएका सबै सहमति सम्बोधन हुनेगरी विद्यालय विद्यार्थी शिक्षक-कर्मचारी मैत्री विद्यालय शिक्षा ऐन जारी गराउन अब आन्दोलन जानु बाहेक कुनै विकल्प रहेन ।”
आन्दोलन अघि बढ्दै जाँदा आगामी चरणमा अवरोधात्मक, अवज्ञा बहिष्कार र काठमाडौँ केन्द्रित सडक आन्दोलनका कार्यक्रमहरू लिएर अगाडि बढ्ने शिक्षक महासंघ आठविसकोट नगर समितिले जनाएको छ।
