आठबिसकोट । रुकुम पश्चिममा यातायात व्यवसायीले मनपरी ढंगले सवारी साधनको क्षमताभन्दा बढी यात्रु बोक्दै आएका छन । पहाडी सडकहरू र तिनमा पनि कच्ची बाटामा थोत्रा सवारी साधनले क्षमताभन्दा बढी यात्रु बोकेर हिँड्दा दुर्घटनाको जोखिम बढ्दै गएको छ ।सिट क्षमता पुरा भएर महिला समेत यात्रुलाई जिपको दुई साईड र छतमा झुन्ड्याएर यात्रा गरिरहेका छन्।

पिकअप जिपलाई ५ जना यात्रु बोक्ने अनुमति दिएको हुन्छ । अर्को जिपलाई १४ जना उस्तै प्रकारको रातो नम्बर प्लेटको जिपलाई यात्रु बोक्ने अनुमति छैन । तर रुकुममा भने रातो प्लेटको निजी जिपदेखि ५ जना यात्रु बोक्ने अनुमति पाएको जिपले भित्र कोचाकोच यात्रु राखेर मात्रै नभएर खस्नै लाग्ने गरी बाहिर छेउ र छतमा यात्रु बोकेका छन् । प्रहरी प्रशासन मौन हुन्छन्। मुख्य सडक र आफुलाई पायक पर्ने ठाउँमा मात्रै ट्राफिक प्रहरीको चेकिङ हुँदा यातायात व्यवसायीले मनपरी गर्दै आएको स्थानीयको गुनासो छ ।

शनिवार बेलुका रुकुम पश्चिमको आठबिसकोट नगरपालिका- ८ दाजे बाट वडा नम्वर -९ राडीका लागि छुटेको मनिषा सुसिल करिष्मा ट्राभल्स लेखेको जिप भित्र कोचाकोच यात्रु थिए । जिपले बाहिर र छतमा पनी यात्रुलाई कोचाकोच गरेर राखेको पाईएको छ । यो रुटमा दिनहुँ राडीबजार देखि दाजे आउजाउमा यात्रु कोचेरै यात्रा गरिन्छ । भिरालो बाटो त्यस माथि क्षमता भन्दा बढी यात्रु बोक्दा दुर्घटना निम्त्याउने खतरा बढेको देखिन्छ ।

गाउँतिर प्रहरीको आँखा छलेरमात्रै नभएर बजार क्षेत्र, प्रहरी, प्रशासन, ट्राफिक प्रहरी कार्यालयकै अगाडि क्षमताभन्दा बढी यात्रु बोक्ने गरेका छन् । तर प्रहरी चेकिङ मा पनि चिनजानको आधारमा कारबाही नगर्ने र चेकपोष्ट आउनेबित्तिकै यात्रुलाई झारेर हिँड्न लगाउने र अलि पर पुगेपछि पुनः जिपमै चढाउने गरेका छन् । त्यतिमात्र नभएर जिपमा झुन्डिएर यात्रा गर्ने गरिएका छन् ।