आठबिसकोट । रुकुम पश्चिमको आठबिसकोटमा आगामी माघ २२ गतेदेखि एचपिभी खोप लगाउन सुरु गरिने भएको छ । महिलाहरूमा हुने पाठेघरको मुखको क्यान्सर विरुद्ध एचपिभी खोप अभियान अन्तर्गत नगरपालिकाका १४ वटै वडामा खोप लगाइने आठबिसकोट नगर अस्पताल कार्यालय आठबिसकोटले जनाएको छ । आज नगरपालिकाको सभाहलमा एक कार्यक्रमका विच शाखाले कक्षा ६ देखि १० सम्मका छात्रा र विद्यालय नजाने किशोरी गरी १० देखि १४ वर्ष उमेर समूहका गरी २२ सय ८ जनाले यो खोप लगाउने जनाएको छ । 
विद्यालय नजाने १० देखि १४ वर्ष उमेरकाले परिचय खुल्ने कागजपत्र सहित पायक पर्ने विद्यालयमा गएर खोप लगाउन सक्ने स्वास्थ्य तथा सामाजिक विकास शाखा सह संयोजक चङ्खलाल पुनले जानकारी दिए । पाठेघरको मुखको क्यान्सर मुख्य गरेर एच.पि.भी. भाइरसको सङ्क्रमणबाट हुने पुनले बताए । आठबिसकोटका ४० वटा खोप केन्द्रबाट यही माघ २२ गतेदेखि २६ गतेसम्म सञ्चालन गरिने बताईएको छ । विद्यालयमा खोप केन्द्र हुने र खोप केन्द्रमा खोप लगाउन छुटेकाहरुले स्वास्थ्य संस्थामा गएर खोप लगाउन सक्नेछन्।
उक्त खोप सञ्चालनका लागी ४० जना स्वास्थ्यकर्मी, ६७ जना महिला स्वास्थ्य स्वयंमसेविका परिचालन गरिएको आठबिसकोट नगर अस्पताल स्वास्थ्य तथा सामाजिक विकास शाखा संयोजक प्रेम रोकायले जानकारी दिए । उनका अनुसार २१ सय ७९ जना कक्षा ६ देखि १० कक्षा सम्मका र २९ जना विद्यालय बाहिर रहेका किशोरीले खोप लगाउने बताए । हाल सम्म आठबिसकोटमा ५ जना लाई संक्रमण भएको बताईन्छ । पालिका खोप समन्वय समिति र संचार क्षेत्रको अभिमुखीकरण कार्यक्रमको आयोजना गरेर खोप बारे जानकारी गराईएको थियो । कार्यक्रममा स्वास्थ्य शाखाका निमित्त अस्पताल प्रमुख धनन्जय शर्मा, निमित्त प्रमुख प्रशासकीय अधिकृत ईन्द्र बहादुर बिष्ट, नगर प्रमुख रवि केसी, स्वास्थ्यकर्मी , जनप्रतिनिधिहरु र पत्रकारहरुको उपस्थिति रहेको थियो भने कार्यक्रमको सञ्चालन प्रेम रोकायले गरेका थिए ।
नेपाल सरकार स्वास्थ्य तथा जनसंख्या मन्त्रालयले पाठेघरको मुखको क्यान्सर बिरुद्धको एच.पि.भी.खोप देशैभरी एकैसाथ अभियानको रूपमा २०८१ माघ २२ गते देखि फागुन ६ गतेसम्म संचालन गर्न लागेको छ । सूचिकृत स्वास्थ्य संस्थाहरूबाट कक्षा ६ देखि कक्षा १० सम्म अध्यायन अध्यापन हुने बिद्यालयलाई खोप केन्द्रको रूपमा स्थापना गरी निशुल्करूपमा राष्ट्रिय खोप अभियान संचालन सुरु गरिएको हो । यो रोगबाट नेपालमा प्रत्येक दिन ४ जना महिलाको मृत्यु हुन्छ भने बिभिन्न क्यान्सरमध्ये पाठेघरको मुखको क्यान्सर महिलाको मृत्युको पहिलो कारण बनेको छ ।
