काठमाडौँ । भारतको महाराष्ट्रस्थित जलगाउँमा बुधबार साँझ रेलमा किचिएर ७ जना नेपालीको मृत्यु भएको दाबी गरिएको छ । प्रवासी नेपाली सम्पर्क मञ्च भारत, महाराष्ट्र राज्य समितिले जारी गरेको विज्ञप्तिमा मृत्यु हुने १३ मध्ये ७ जना नेपाली रहेको दाबी गरिएको हो ।
मृत्यु हुनेमा राधेश्याम, नन्दराम विक (अछाम), कमला भण्डारी (कैलाली), हिमु विक (अछाम), जयकला भट्ट (अछाम), मैसरा विक (अछाम) र लच्छिराम कन्नु पासवान छन् । राधेश्याम र लच्छिरामको ठेगाना खुलेको छैन । कैलालीको मोहन्याल गाउँपालिकाका अध्यक्ष देवीदत्त उपाध्यायले दुर्घटनामा निधन भएकी भण्डारी रोजगारीका लागि बम्बई जाँदै गरेको खबर आएको बताए ।
दुर्घटनामा अन्य १० जना घाइते भएका छन् । घाइतेमध्ये ४ जनाको अवस्था गम्भीर रहेको भारतीय सञ्चारमाध्यमहरूले जनाएका छन् । लखनउबाट मुम्बईतर्फ गइरहेको पुष्पक एक्सप्रेसमा एकाएक आगलागी भएको हल्ला फैलिएको र अत्तालिएर केही यात्रुले ट्रेनको चेन तानेका थिए । त्यसपछि यात्रुहरू हतार गर्दै ट्रेनबाट ओर्लिए, तर त्यहीबेला छेउको ट्रयाकमा आएको कर्नाटक एक्सप्रेस ट्रेनले १३ जना यात्रुलाई किच्दा यात्रुहरको मृत्यु भएको भारतीय सञ्चार माध्यमहरुले जनाएका छन् ।
लखनउबाट हिँडेको पुष्पक एक्सप्रेस ट्रेन भारतीय समयअनुसार बुधबार साँझ ४ः४२ बजे ४२५ किलोमिटर दूरी तय गरेर जलगाउँको पचोरा स्टेसननजिक पुगेपछि यो दुर्घटना भएको हो । महाराष्ट्रका मुख्यमन्त्री देवेन्द्र फडणवीसले दुर्घटनामा ज्यान गुमाएका परिवारलाई ५ लाख राहत उपलब्ध गराउने घोषणा गरेका छन् । त्यस्तै, रेलवेले मृतक परिवारलाई डेढ लाख, गम्भीर घाइतेलाई ५० हजार र सामान्य घाइतेलाई ५ हजार नगद आर्थिक सहयोग गर्ने घोषणा गरेको छ ।
