आठबिसकोट । रुकुम जिल्लाको आठबिसकोट नगरपालिकामा एउटै मात्र प्रभु बैंक छ । पालिकाभरी एउटै मात्र बैंक हुँदा जनताका दुख झन बढ्दै गएका छन्। बैँकमा आउने सेवाग्राहीहरूले सहज र चुस्त दुरुस्त सेवा पाउने अपेक्षा गर्छन् । तर उनीहरुलाई बैँकमा पुगेपछी एककिसिमको लडाई लड्नुपर्छ । स्थानीय सरकार सञ्चालन भएको झण्डै ८ वर्ष पुग्दा पनी बैँक क्षेत्रमा झनझन समस्या थपिदै गएका छन्। भुगोल ठुलो र रुकुम पश्चिम , जाजरकोट सम्मका सेवाग्राही उक्त बैँकमा आउने हुँदा बैंकमा भिडभाड बढेपछि सेवाग्राहीलाई सेवा लिन सकस भएको हो ।

चेक साट्ने, भौचर भर्ने, पेन्सन बुझ्ने ,खाता खोल्ने जस्ता काम काजका लागि बैंकमा पुग्ने सेवाग्राहीले सहज रुपमा सेवा पाउन नसकेको गुनासो गरेका छन् । किस्ता निकाल्न भोग्नुपरेको सास्तीले भूकम्पपीडित समेत मर्कामा परेका छन्। नगरपालिकाको वडा नम्वर १,२,३,४,५ र ६ का नागरिकहरु बैँककै कामका लागि एक हप्ताको समय छुट्याएर पालिका केन्द्र आउने गरेका छन्। समयमै बैँकमा पालो नपाउने र आउजाउ मा मात्रै दुई दिन लाग्ने हुँदा उनीहरुलाई बैङ्किङ कारोबारोमा समस्या थपिएको छ । यहाँ जिल्ला भित्रबाट मात्र होइन, अन्य जिल्लाबाट पनि सेवाग्राही आउँछन्। स्थानीय तहहरुमा कम्तिमा ३/४ वटा बैंकहरु स्थापना गर्नुपर्नेमा एउटै बैँक हुँदा सास्ती बेहोर्नु परेको छ । यहाँ भुगोल ठुलो र वस्ती धेरै टाढा भएकोले अवस्था हेरेर बैंकहरु थप्नुपर्ने देखिन्छ ।

सामाजिक सुरक्षा भत्ता बुझ्न जेष्ठ नागरिकहरु अरुकै आवश्यक परेको बेला सेवाग्राहीहरूले रकम झिक्न नपाउँदा सास्ती खेप्नुपरेको छ । आइतवार चेक सकिएर चेक थप्न र सामाजिक सुरक्षाभत्ता लिन आएका आठबिसकोट १२ का ७५ वर्षिय रते पुन बैँकको गेटमा भेटिए । उनी बिहान १० बजे बैंकमा पुगेर आफ्नो चेक सकिएको जानकारी बैंकलाई गराउँदा बैँकले दिउँसो ३ बजे मात्रै चेक बन्छ भनेपछी उनी दिनभर चेकको बन्ने आशामा बसे तर त्यो दिन उनले चेक पाएनन्। आफ्नो सामाजिक सुरक्षाभत्ता निकालेर घर खर्च चलाउनका लागि चेक लिन आएका पुनले दिनभर कुरेर पनि चेक नपाएको गुनासो पोखे । उनले भने घरबाट बैँक पुग्न आतेजाते ६ सय रुपैयाँ लाग्छ । बासबस्नुपर्दा एक दुई हजार नै सकिन्छ । बैंकले समयमै काम नगर्दा दुख पाउनु पर्यो । उनी जस्तै हजारौंका पिडा छन्। पोषण भत्ता, भुकम्पपिडितको किस्ता र अन्य कारोबारका लागी पनी सेवाग्राहीले सास्ती खेप्दै आएका छन्।

ग्रामीण भेकमा बैंकिङ कारोबार कम हुन्छ भनेर पनि बैंक तथा वित्तीय संस्था गाउँगाउँमा जान मान्दैनन् । जसको सास्ती स्थानीयले खेप्नु परेको देखिन्छ । दिनभर बैंकको पालो कुरेर खाता नखोली घर फर्कनुपर्ने बाध्यता उनीहरुमा छ ।

सधैँ जसो सामाजिक सुरक्षा भत्ता लिन आउने सेवाग्राहीले सास्ती खेप्ने गरेको आठबिसकोटको प्रभु बैंकमा अहिले चाप बढेको छ । भूकम्प प्रभावितहरु खाता सञ्चालनका लागि बिहानैदेखि बेलुकासम्म बैंक अगाडि आएर बसेका हुन्छन् ।

तर दिनभरी लाइनमा पालो कुरेर पनि काम नगरी उनीहरु घर फर्कने गरेका छन् । खाता खोल्नसमेत बैंकमा संघर्ष गर्नुपर्ने अवस्था छ । बैंकमा बढेको भीडलाई मध्यनजर गर्दै वडाहरुमा सामाजिक सुरक्षा, पोषण भत्ता र भूकम्प प्रभावितहरुका लागि खाता सञ्चालन गर्न शिविर सञ्चालन गर्नुपर्ने आवश्यकता देखिन्छ । पालिकामा एक मात्र बैंक हुदा जेष्ठ नागरिकका लागि वैंकिंक प्रणाली झन्झटिलो भएकाले पालिकाको भुगोल तथा जनसंख्या अनुसार बैंकहरु थप्नुपर्ने तर आठ वर्ष सम्म एउटै बैँक रहेको छ ।दिनहुँ बैंकमा भीड बढेपछि वृद्धवृद्धा र महिलाहरुले अरुकै सहरा लिनुपरेको गुनासो गरेका छन् ।

देशैभरका सबै पालिकाहरुमा बैंकिङ सेवा पुर्याउने सरकारको नीति छ । मुलुकभरका पालिकामा बैंकिङ सेवा पुगे पनि प्रयाप्त संख्यामा बैंक नहुँदा स्थानीयले सास्ती खेप्नुपरेको छ ।