रुकुम पश्चिम। आठबिसकोट नगरपालिका–८ दाजेमा रहेको हिमालय माध्यमिक विद्यालयले विद्यालयका लागि आवश्यक जग्गा खरिद गर्न आर्थिक सहयोगको अपिल गरेको छ।
विद्यालयले सार्वजनिक गरेको अपिलपत्र अनुसार विद्यालयको गेटमा रहेको जग्गा खरिद गर्न ११ लाख रुपैयाँ आवश्यक परेको र जग्गाधनी कालो खत्री सँग उक्त जग्गा खरिदका लागि सम्झौता भइसकेको जनाउँदै विद्यालयले आवश्यक रकम जुटाउन समस्या परेको जनाएको छ।
विद्यालयले अभिभावक, वडा नं. ८ का वडा अध्यक्ष, विद्यालय व्यवस्थापन समिति तथा शिक्षक–कर्मचारी लगायत सम्बन्धित सबैमा सहयोगका लागि आग्रह गरेको छ। विद्यालयले अपिल मार्फत स्वदेश तथा विदेशमा रहेका शुभेच्छुक, अभिभावक तथा सहयोगी मनहरूलाई आफूले सक्दो आर्थिक सहयोग गरिदिन अनुरोध गरेको हो।
विद्यालयका प्रधानाध्यापक नवराज बुढा र विद्यालय व्यवस्थापन समितिका अध्यक्ष चन्द्रबहादुर नेपालीद्वारा हस्ताक्षरित अपिल पत्रमा सहयोग गर्न इच्छुक महानुभावहरूका लागि विद्यालयको बैंक खाता उपलब्ध गराइएको उल्लेख छ।
विद्यालयका लागि आवश्यक जग्गा व्यवस्थापन गर्नुपर्ने भएकाले आर्थिक स्रोत जुटाउन अपिल गरिएको विद्यालयले जनाएको छ। विद्यालयले सहयोगबाट जग्गा खरिद प्रक्रिया अघि बढाई विद्यालयको भौतिक पूर्वाधार तथा शैक्षिक वातावरण थप व्यवस्थित बनाउन सहयोग पुग्ने अपेक्षा गरेको छ।
