काठमाडौं । रसुवाको भोटेकोशीमा आएको बाढीपछि त्रिशूली–३ ‘ए’ जलविद्युत आयोजनाको सुरुङभित्र फसेका कवीर महर्जनको उद्धार भएपछि उनकी श्रीमती हिराशोभा महर्जनले राहतको सास फेरेकी छन्। गत भदौ १० गतेदेखि सम्पर्कविहिन भएका कबिर लाई आज बिहान मात्रै सकुशल उद्धार गरिएको छ ।
बाढीले जलविद्युत आयोजना प्रभावित भएको खबर पाएपछि हिराशोभा श्रीमानको अवस्थालाई लिएर निकै चिन्तित थिइन्। परिवारले कवीरको खोजीका लागि ऊर्जा मन्त्रालयदेखि नेपाल विद्युत प्राधिकरणसम्म सम्पर्क गरे पनि सुरुङभित्र फसेकाहरूको उद्धार भइरहेको जानकारी मात्रै पाएका थिए। तर जिवित तै छन् । भन्ने कुनै खबर थिएन।
आज शुक्रबार बिहान भने हिराशोभाले नसोचेको खबर पाइन्। नेपाली सेनाको उद्धार टोलीले सुरुङबाट उद्धार गरेका दुई जनामध्ये उनका श्रीमान् कवीर पनि रहेको पुष्टि भयो।
श्रीमान् सकुशल उद्धार भएको खबर पाएपछि भावुक बनेकी हिराशोभाले आफूले कवीर जीवितै फर्किने आशा लगभग मारिसकेको उज्यालोपाटी लाई बताइन्।
‘मैले त उहाँ बाँच्नुहोला भन्ने आशा मारिसकेको थिएँ। आज उहाँलाई सकुशल देख्न पाउँदा ठूलो खुशी मिलेको छ। १० दिन पछि उहाँ लाई भेट्न पाउँदा दोस्रो जन्म लिए जस्तै भएको छ । अहिले अस्पतालमा सपरिवार उहाँ लाई भेट्न जाँदै छौँ।
कवीरको उद्धारसँगै परिवारमा लामो समयदेखि छाएको चिन्ता र त्रास हटेको छ। श्रीमानको सकुशल उद्धारलाई हिराशोभाले आफ्नो जीवनकै अविस्मरणीय खुसीका रूपमा लिएकी छन्।
